ياغرامي سافرت كل الحروف=إعذريني معترف ، يامسلمه
أعترف بالبخل في حق الضيوف!=غير قلبي وش تبين أقدمه
مرني من عطرك العابر طيوف=تنشر آيات الرضى والمرحمه
أنتي عن كل الخلايق فيك نوف=نادرٍ جنسك عساني ماعدمه
حــارني وصفك وطولت الوقوف=فكرتي خرسا وشعري تمتمه
أنتي مايحتاج وصفك بالوصوف=أنتي ديوانٍ بدون مقدمه
من يشوفك في نقابك ، وش يشوف ؟=شمس صبحٍ بالسحاب ملثمه!
لنتشر ليل الشعر فوق الكتوف=صاااح مظلوم الهوى ، يااامحكمه!
في عيونك دار فكر الفيلسوف=كنه يقرا في عيونك ملحمه
كن بين أهدابها مصنع سيوف!=تحتها كل القلوب محطمه
مالنا في عالم الحب معروف=نعتبر منك التواضع ، مكرمه
ماحدٍ في حالة العاشق يروف=والظروف تعاكسه ما تخدمه
مابقى لهل الهوى قلبٍ عطوف=غير قانون العصور المظلمه
وينكم ياهل الهوى ، صفوا صفوف=شكلوا للعاشقين منظمه
الهواوي بين ظلم وبين خوف=صابرٍ عبر السنين المعتمه
كم سنه مرت ، وكم مرت ظروف=بين عصر أدم وعصر العولمه!!
للشاعر / فيصل الرياحي رحمه الله واسكنه فسيح جناته
أنت غير مسجل في منتديات الوئام . للتسجيل الرجاء إضغط هنـا
يا غرامي 
