شهدت جامعة الملك سعود .. أقسام العلوم والدراسات الطبية بالملز بالأمس حدثاً غير عادي ..
ففي صبيحة يوم الأربعاء الموافق 15-8-1422هـ .. ( شرايكم ما أنفع معدة أخبار
حدثت في المركز الترفيهي بالجامعة ( يلوموني في هالمبنى اللي فيه الصاحي والطاحي .. قال كافتيريا قال ) حدثت جريمة سرقة ومن بعدها اعتداء و شروع في قتل ..
( كذا الإشاعات ولا بلاش . . )
وصرح عدد من الطالبات بعدة روايات .. وإن كان آكدها أنه قد تم الاعتداء من قبل طالبة على طالبة أخرى بالضرب بواسطة أداة حادة تسببت في جرح نقلت على إثره المصابة بسيارة الإسعاف إلى المستشفى ..
ويقال أن الحادثة قد تمت بسبب أن الجانية ( لاحظوا المعتدية ) قامت بمحاولة سرقة جوّال المجني عليها , وعند قيام المجني عليها بمحاولة للدفاع عن نفسها ( الله يعلم شلون عاد ) قامت الجانية بضرب المجني عليها وطعنها في مكان ما في جسمها (شين وقواية عين ) ..
(من هنا عاد السالفة أكيدة مرررررة ومن مصدر موثوق بالحيل )
وقد شوهدت المجني عليها ممدة على ( الكاونتر ) في استراحة البوابة رقم ثلاثة في انتظار سيارة الإسعاف , وقد بان على المصابة آثارا للدم ولم تكن تنزف بقوة بالغة .. ( يعني أبشركم البنت حية ) ..
هنا القصة انتهت ..
وباقي تعليقي ..
أولا .. بنات ما عد هنا بنات ..
وعشان تعرفون بس إن البنات تطوروا وصاروا يعرفون يتهاشون , ما عاد هوب شد شعور وعض وبس .. لااااا صارت السالفة طعن وضرب ..
وشيل أدوات حادة .. وبكرة يملون السجون والأحداث .. يالله سترك ..
إللي مشغل بالي .. إنه حتى الأولاد في هالمرحلة يبطلون هواش زي كذا ..
يعني خلوها للمتوسط للثانوي .. بس في الجاااامعة ..
ثانيا .. ودكم بس تشوفون البنات وهم يتناقلون الخبر ..
بالله يعني أنا في الملز .. ولا أدري عن شي .. طالعة من قاعة الاختبار لا لي ولا علي ..
تدق علي صاحبتي واللي تدرس في عليشة .. لاحظوا .. وتقول لي درييييتي وش صاااااار عندكم ..
ما أدري شلون عرفت قبلي !!!
فعلا الوضع كان يفشل , والبنات الله يهديهم صاير شكلهم يضحك ..
حتى أسلوبهم في نقل الحدث يقهر , ما أدري مبسوطين , حاسين بالإثارة ويبون يطلعون من جو الدراسة بأي شكل ..
المهم أنهم قهروني ..
ثالثا .. الإشاعات والبهارات اللي حولت الحادثة إلى فلم هوليودي ما تقدر على إنتاجه هوليود بكبرها ..
لااا وفيه بنات واقعيات بزيادة وضد الإشاعات تماما ..
صاروا ينكرون الشي هذا ويقولون تلاقون البنت داخت وتعورت والبنات ألفوا لهم سالفة وسووها قصة ..
كنت راح أصدق الرواية الأخيرة لولا إني سمعت القصة من مصدر شهد الحادثة ..
رابعا .. لي كلمة لإدارة الجامعة وشؤون الطالبات ..
بالله ألحين وش السواة مع بطاقات الخروج هذي ؟!
إذا أنتم ما ترضون تطلعونا قبل ما ينتهي وقت المحاضرة .. حتى لو كانت ملغية ..
شلون تبونا نجلس في مكان فيه بنات مثل هالأشكال ..
أمس حوادث اعتداء ..
وقبل شهر شذوذ ..
وبكرة الله العالم وش بيصير ..
وأنتم تمنعونا من الخروج خايفين من الشر برا ..
شوفوا اللي جوا طيب .. j
خامسا .. كلمة للطالبات ..
اسمعوني زين ..
إياني وإياكم تروحون للمباني اللي تكاد تكون مهجورة .. حتى لو تبين تقابلين دكتورة أجليها لوقت المحاضرة ولا روحي بشلتك معك ..
حتى المكتبة لا تروحين لها لحالك .. لأنها أكثر الأماكن هدوءا .. ورومانسية بعد
عشان كذا تغري بعض الفئات ..
الأصنصيرات اللي تقعد لها ساعة ماوصلت للدور .. لا تدخلينها لحالك .. صدقيني أحسن ..
على الأقل تضمنين إنها ماتوقف عليك وانت فيها ..
أي وحدة تتلفظ عليك ولا تغلط .. قولي لها سمّي طال عمرك .. مالك إلا اللي يرضيك .. وشوا له المشاكل ..
ما تدرين وش تطلع لك من شنطتها ..
وختاما أقول ..
الله يستر علينا وعلى بنات المسلمين ..
قصتك بصراحه خوووفتني مره من الجامعه لالالا مابي ادرس هنا .. خلاص فرصه اقوول للبابا .. يسفرني بره ادرس ازينلي .. بس ووين ارووح بره حرب بعد .. والله بلشه .. ارووح مصر احسن على الاقل عرب اعرف حكيهم ..
بس من جد من جد قصه تروووع انا سمعت فيها وانا بالصف وعلى مقعدي .. تصوروا ..
بنات اخر زمن اللهم ياكافي ..
والله لو يوكلونا انا والمملوحه وبنت الاصايل وعاشقه ودمووع والبقيه الباقيه من خيرة بنات منتدانا .. كان عرفنا شلووون نسنعهم بنات اللذين .