( 1 )
يا فيصل الحامد صباح المشاوير=اللي يحيط (إ)بها العنا ويغذاها!
صباح يخلو من نشيد العصافير=صباح فيه الشمس يخجل ضياها!!
صباح قلب ٍ غير ومواجع ٍ غير=صباح روح ٍ قحط تشكي ضماها!!
صباح عيّا لا يجي بالتباشير=زوّد على روح المعنّـا عناها!
مانيب بـّخير إن قلت لك إني بخير=لا شك ورّتني الليالي قساها!!!
(2)
يا صاحبي لا يلحقك شك وتقول=إن الزمان الشين غيّر في حالي!
أنا على خبرك على الود موصول=وطاريك في قلبي .. وذكرك في بالي!
وخذها حقيقه من رفيقك على طول=ببقى معك وافي برغم إنشغالي!!
(3)
يا ليتني لا من بغيتك لقيتك=ما كان هذا ياهوى البال حالي!
أشتاق لك .. وآصل بشوقي لبيتك=وأرجع بدونك يا حبيبي .. لحالي!!
تايه ولا لي غير ليتك يا ليتك=تحس باللي في غيابك جرالي!!
(4)
صح الله لسان الوصل واللقيا وذكراها=وسم ّ الله ليال الصيف والفرقى وطاريها!
وعينٍ من فراق اللي تحبه طوّل بكاها=عزاها دمعها لا صار ما به من يعزيها!!
وقلبٍ موّل الونّه من أعماقه وسـرّاها=ماهيب اللي على شفـّه ولاهيب اللي يبغيها!
ولكنّ الزمن والوقت والدنيا وبلواها=تحدّ قلوب عشـّاق الهوى للي يعنيـها!!
(5)
لو إن لي غيره من الناس محبوب=ما راح ليلي في الرجا والتمنّي!
ليته خذاني معْه أو ليته يتوب=عن الغياب اللي سطا وإمتحنّي!!
ولا قمت أداري وابل الدمع بإسلوب=خوف الحكي .. ولا خفوقي يونّي!!
يا دوب أداري دمعة الشوق يا دوب=كنّي .. عجزت أعرف وشلون كني؟!!
أنت غير مسجل في منتديات الوئام . للتسجيل الرجاء إضغط هنـا
أبيات قد لا تكتمل..! 
