حتى السما ماهي السما .. حتى المطر ماهو المطر=كل شي من بعدك ذبل .. حتى فؤادي والعيون
مات الأمل في داخلي .. والفرح من حزني إنتحر=وشلون أبفرح والفرح من وين ماكنتي يكون
ياقاتلتني جرح سكّينك نزف دمٍ حمر=عودي أو أخذي خافقٍ تكاثرت فيه الطعون
من وين ماأسوق القدم طيفك قدم عيني يمر=وأقبل أضمّه خايفٍ يرحل ويترك لي الشجون
شوفي القمر كيف إختفى ماعاد يحلاله سهر=شوفي حمامات الفجر ناحت على خضر الغصون
شوفي النوارس تنتحب .. تبكي على شطّ البحر=شوفي الصحاري المجدبه تنعي غيابك للمزون
شوفي عيوني سافرت .. شوفي خفوقي إنكسر=شوفيني طفلٍ غايته يغفى على صدرٍ حنون
شوفيني من بعدك أونّ .. صبحي شقا وليلي قهر=فقدت عقلي .. صرت أحس إني على حدّ الجنون
ياوين أبلقى من بعد فرقاك للضحكه ثغر=ياوين أبلقى من بعد فرقاك لعيوني جفون
لا لا تقولين الصبر .. ماعاد أبد فيني صبر=كل اللي أقدره البكا .. وأقول ياجرحي تمون
إن قلت هانت ولّعت في خافقي جمرة سقر=وشلون أهوّنها واهي صعبه على قلبي تهون
وإن كان ودك أنتهي من كل هذا وأختصر=تكرّمي بس وإسمعي هالبيت ياشوق العيون
محمّد اللي تعرفي .. من بعد غيبتك إنتحر=واللي نزف هذا الألم .. طيفٍ غدى كلّه طعون