جروح البيـن ودروب المحبـه = لها في خافقـي والصـدر قبّـه
تلوّع مـن يلـد العيـن فينـي = على من زل سمّه لـي وصبّـه
بعد مالبارحه وسـدت راسـي = على يمناي ( وقّـت المنبّـه )
على آذان الفجر واليـوم ثالـث = وحزني النوم عن طرفي هربّـه
سرحت افكـر بخـلٍ جفانـي = عسا اوضاعه تمـام ومستتبّـه
نعى الله ياهوى بالي نعـى الله = محـبٍ مايراعـي مـن يحبّـه
هويتك وادري ان قلبك هواوي = مثل من عق في زرعه وجبّـه
تلوعني بهجرانـك وانـا اللـي = غدى من كثر ما حبّك مسبّـه !
عقب ماقفيت عنّي صرت هايم = غريق من العنا في وسط غبّـه
مطبات الوصال ادمت ارجيلـي = اعـدّي مـن مطبّـه لا مطبّـه
اخفّي الدمـع وانـادي لقلبـي = ياقلبي دمعك المفضـوح غبّـه
اخاف ان حد لمح عبرات طرفك = سألني : ليـه وعيونـك تكبّـه
اصد ولاقـدرت اقـول جابـه = لايدري عن سبب جرحي وطبّه
عليـك الله وامـان الله وامانـه = اداري النود عـن حبـك تهبّـه
انا ماخترت احبـك لكـن انـه = جذبنـي بارقـك والله ربّــه
سرابك غرّني واغرى فـوادي = ظمـاي يسوقنـي علّـي انبّـه
وخلاني غرامك شـوف عينـك = اجي للمرقـب العالـي واذبـه
وحيد من الحزن في راس نايف = سوى الطير الوحش ماهو يربّه
اردد ونتـي واشكـي لحالـي = فراق اللي خذا القلـب ولعبّـه
يجيني طيفـه العابـر واحسّـه = قبالي واحضـن ايدينـه والبّـه
يشاكيني وانا اشكي له ويبكـي = من ظروف الزمـان المشرئبّـه
خذتني عنـك لكـن مانسيتـك = بقلبـي منزلـك ماحـدٍ يطبّـه
على ذا الحال قدلي عام واكثـر = وانـا مابيـن ياعلّـه واربّـه
لاجيت ارقد سرى طيفك بفكري = ونار الشوق في صدري يشبّـه
ولا يتركـنـي الا والـمـؤذن = رفع بالصوت او.. دق المنبّه.؟
علي بن مشرف
.
.