شوفوا ابا القوايل يغازل في العثيم مول اللة لا يبلانا

يجهل الجاهل على جهل الجهـول
ويتحمل من جهل جهـل الجهـال
لا سقا الله ساعـة بالعثيـم مـول
رحت اودي حرمتي عقب الـزوال
واختبرت القلب في ساعة فضـول
كنت اظنه راسيـن مثـل الجبـال
مادريت انه على الفلـس محبـول
وقيـده اللـي مايـرده والعقـال
جيت سوقن جامعن من كـل زول
الكـداري والقمـاري والـغـزال
قمت اطالع واتمشى فـي ذهـول
واتلفت من يميـن ومـن شمـال
وارتبشت وطحت في باب الدخـول
طحت مابين المحاسـب والسـلال
والسبب من داعج العيـن البتـول
فوق رمشه حاجبـه كنـه اهـلال
سيف خشمه والوجن وردن ذبـول
ومن ورا الشيله لخديـه اشتعـال
والثنايـا فـي تبسمهـا الخجـول
ساطعاتـن سابحاتـن بـالـزلال
وعنقها مفهوق والكتـف مهـدول
والمشي مشي الرزينـات الثقـال
والخصر ملهوف والردف معـزول
يابو نايف كنهـا بعـض الـدلال
وصدرها مزموم والجيب محلـول
وان مشت جاني من الهز اختـلال
والردايف لامشـت شـي يهـول
من تحت ثوبه غدا لهـن اجتـوال
كـن ردفـه بالطلـوع وبالنـزول
لامشت يعطي دروسـن للضـلال
او يحرج من يسـوم وكـم نقـول
او بروقن مرهشاتـن فـي خيـال
وشفت شين بـس مـاودي اقـول
وشفت شين غيـر هـذا مايقـال
اشهد انه سجلـت بالقلـب قـول
وكبرين بالكبد من تحت الطحـال
تلعب الفتبول وايضا الهارت بـول
مايجاريهـا النصـر وإلا الهـلال
وارسل الشيطان من عنده رسـول
امتخصص فـي علـوم الانحـلال
قـال يالله قـم تحـرك ياكسـول
ماتلاقـي غيرهـا فـي هالكمـال
وجيتها خايف ولا ادري ويش اقول
واستحت هي وابعدت بنت الحـلال
وجيت اكلمها وإ يلا تقل إمغيـول
وراح صوتي وصار بالعين احولال
واتشجع قلـت يابنـت إمعقـول ؟
كل هذا فيك مـن زيـن وجمـال
قالت ابعد قلـت ماشيـن يحـول
بيننا واللـي تبيـن بـلا سـؤال
قالت اسمع مانت جاهل بالاصـول
ضف وجهك لافضحك بين الرجـال
قلت يالله بـس هرجـك لايطـول
وادفع فلوس المقاضـي بالريـال
بالمرق وجهي مع الناس مغسـول
ماستحى قالت اجـل قـرب تعـال
واخطفت قوطي من الادراج فـول
المدمس العريـض مـن الطـوال
وصكتن به صكت القـرم الكتـول
وشقت الجبهه ودم الـراس سـال
ثم قامت تضربـن باللـي تطـول
وافزعت معهـا علـي ام العيـال
وافزعن كل الحريم بـدون قـول
يضربنـن بالقواطـي والـحـلال
وبالمكانس والصواني والسطـول
والعجايـز يفزعـن لـو بالتفـال
اخلطني خلـط عجـان إمعمـول
واضربني ضرب قـوات احتـلال
واطلعوني سحب مانيب إمحمـول
ساعتن بالشمس مانـي بالظـلال
الشعر منحاس والوجـه إمعفـول
والثيـاب امقطعاتـن والنـعـال
كني اللـي آكلـن كيلـو هلـول
ريحتـن ماهيـب حتـى بالخيـال
وعقب هذا صرت اذل من الذلـول
تركبـن ام العيـال بـلا إحـبـال
وكل يومن تركبن مثـل الرحـول
مشيتـي سيـده ولا فيهـا ميـال
وقالت اركب واعتمر بي يالبطـول
واسأل الله يغفـر إذنوبـن إثقـال
وبالمطاف الناس يطافـون حـول
بيت رب البيت ربـي ذا الجـلال
إلا انا مـن بدهـم تقـل إمهبـول
ما أطوف امشي من الذلـه عـدال
ودق قلبي مثـل دقـات الطبـول
لا حكوا بالسوق او جا له مجـال

منقووووووووول الشاعر ابا القوايل

بسم الله الرحمن الرحيم

النهر الخالد

السلام عليكم ورحمة الله وبركاته


مسكين ابو القوايل
لكن يستــــــــــــــــاهل اللي جاه
واللي يحط نفسه في مثل هالواقف يستاهل بعد

قصيده قريتها .. جميله في سياقها وفي معانيها
إلا أنه اقحم العثيم مول .. وشكل القصيده في غير العثيم !!

الف شكر يالنهر الخالد على اختياااااااااارك



اخوك
حسام الشعر

وارتبشت وطحت في باب الدخـول
طحت مابين المحاسـب والسـلال

والسبب من داعج العيـن البتـول
فوق رمشه حاجبـه كنـه اهـلال


الظاهر ابا القوايل .. عنده الشوف شجر

خثع في الدرج وطاح ,,

اللي يشوف الزين ما يطيح يقعد يترزز ,

هلا وغلا النهر الخالد

والحمدلله على السلامة .. وين الغيبات يا ابن الناس لك وحشة ,

مشكور على نقل هذه الأبيات ..

وتسلم اناملك سيدي ,,,

شرفني مرورك اخوي الحسام يحفظك ربي

	المشاركة الأصلية كتبت بواسطة أبو خـ البجادي ـالد

	وارتبشت وطحت في باب الدخـول طحت مابين المحاسـب والسـلال والسبب من داعج العيـن البتـول فوق رمشه حاجبـه كنـه اهـلال الظاهر ابا القوايل .. عنده الشوف شجر خثع في الدرج وطاح ,, اللي يشوف الزين ما يطيح يقعد بترزز , هلا وغلا النهر الخالد والحمدلله على السلامة .. وين الغيبات يا ابن الناس لك وحشة , مشكور على نقل هذه الأبيات .. وتسلم اناملك سيدي ,,,

هلا بك ابو خالد نورت الصفحه وبعدين وش رايك في ابا القوايل عجزت عظامه تشيله
صا ر يتبطح على الدروج يا كافي0

النهر الخالد

سلمت يداك على النقل الرائع

سلمت يداك على المرور ملكة الاحساس

ههههههههههههههـ

مسكين

الله يعطيك العافيه .. النهر الخالد ..
.
.
.

يستاهل الطيحه على خشته
مين قله يبقق عيووونه بداعج العين

هههههااااااااااااااااااى


الله يستر بس



النهر الخالد

عجبتني القصيدة
والسبب اني ضحكت وما بكيت مثل باقي القصائد


ربي يعطيك العافية

	المشاركة الأصلية كتبت بواسطة سديم

	ههههههههههههههـ مسكين الله يعطيك العافيه .. النهر الخالد .. . . .

شكرا على مرورك سديم وهذا ابا القوايل ما اعتقد انه مسكين الا مسكون