|
ملتقى الأصدقاء تهانينا ، افرآحنا ، أخوتنا ، من هنآ نبدأ .. لاستقبال الأعضاء الجدد ، تكريم الأعضاء |
|
أدوات الموضوع |
02 / 06 / 2002, 22 : 06 AM | #1 | |||||||
سفير الوئام
شكراً: 0
تم شكره 0 مرة في 0 مشاركة
|
مذكرات طالبة جامعية (3)
[c]
تحذير ....... يمنع منعاً باتاً نسخ أو اقتباس أي جزء من هذه المذكرات دون إذن خطي من كاتبتها .. ..... تنويه لم تكن المتعة فقط هي هدفي من الكتابة ولن تكون , فمثلي قد رسم لنفسه أسلوباً في العيش والحياة , أردت أن أعيش بعين مفتوحة , ناقدة , يسير بأمرها قلمي .. ولن يكون لي هدف ومغزى غير الإسهام فعلياً في التصحيح .. مذكرات طالبة جامعية , ماهي إلا فلاشات أسلطها على أكثر القصص غرابة , وأشدها إيلاماً .. لن تكون غير تصوير حي لما يجري في وسط عشت فيه الآن مايقارب الأربع سنوات ولا زال مشواري فيه طويلاً .. مذكرات طالبة جامعية , هو صوت فتاة ترى وتسمع وتعي تماماً ما يجري حولها .. مذكرات طالبة جامعية , ليست حملة إعلانية , تروج ما سيطرح فيها من سلبيات .. بل هي مبضع جراح يشق الجرح ويتمنى أن يساهم في تطهيره .. فمن سيلتهم كلماتها ليؤولها لأهداف مريضة , لا مكان له هنا .. ودمتم ودام النقاء .. ......... سلسلة مذكرات طالبة جامعية (1) (2) ......... فرصة سعيدة ! [/c] خلصت المحاضرة , وخلص الوقت المخصص للسوالف كمان .. وفيما كنت أنا و (( ملاك )) ندخل أغراضنا , كانت ((دينا)) لازالت منسجمة مع السوالف اللي ما رضت تخلص .. أنا : هاه (( دينا )) منتي جاية معانا ؟! إحنا طالعين ألحين .. دينا : أكيد بجي .. ( وجهت كلامها للبنت الغريبة )أوكي صار لازم أمشي ألحين , بعد إذنك , ولنا لقاء في فرصة ثانية إن شاء الله .. الغريبة : إن شاء الله .. فرصة سعيدة على العموم .. دينا : أنا أسعد والله .. .... طلعت أنا و (( ملاك )) و(( دينا )) .. ملاك : (( دينا )) وش السالفة ؟ وش سر هالعلاقة اللي باين إنها توطدت وفي وقت قياسي كمان !! دينا : وش فيها بعد ؟ مو تقولين إنك تعرفتِ على (( الشمس )) في أقل من دقيقة ؟! ملاك : أوكي ما قلت شي , بس كان مجرد استفسار فضولي .. آسفة لو أزعجك .. أنا : صلوا على النبي أمال .. وقولي يا بنت وش السالفة من جد أثرتِ فضولنا .. دينا : إيــــــــــه السالفة .. عاااد أقووووولكم سالفة هالبنت سالفة ولا في الأحلام .. هذي جالسة تحكي لي عن سوالفها هي و صديقها بالتفصيل الممل !! ملاك : صديقها !! دينا : يسسسس |5| أنا : وتحكي لك سوالفهم بالتفصيل والممل كمان ؟!! دينا : يسسسس |5| أنا : ومتى المعرفة ؟! دينا : يمكن ارتاحت لي |2| !!! أنا : (( دينا )) لا تصيرين بهالسذاجة عاد ! وش اللي ارتاحت لك ؟! وبعدين حتى لو كانت المسألة مسألة راحة , ليه تقول لك ؟! دينا : وليه ما تكون هي الساذجة للدرجة اللي تخليها تقول كل شي خاص بهالسهولة؟! ملاك : أو يمكن تكون شايفة نفسها بطلة وتبي تستعرض عليك يا (( دينا )) ! أنا : يمكن فعلاً تكون شايفة نفسها تقوم بعمل بطولي وتستعرض .. كل شي جايز ليه لا ؟! دينا : على كل حال أنا انبسطت وأنا أسمع على فكرة يعني |2|.. أنا : طيب (( دينا )) إنتِ وش دورك بكل هالحكاية ؟! دينا : صديقة |2|.. أنا : دينا وبعدين معك ؟ صديقة إيش الله يصلح قلبك |11| ... دينا : ألحين مو تقولين إنك صرتِ صديقة (( ملاك )) في أقل من دقيقة ؟! أنا : لا أنا ما قلت كذا , ولا (( ملاك )) قالت .. بعدين افرضي أنه إحنا صرنا صديقات في أقل من دقيقة , مو معنى هذا أنه أي وحدة تقابلينها و تتكلمين معاها تصير صديقتك .. يعني مو شرط أنه كل وحدة تصير تستاهل .. دينا : أوكي , ما صرتوا صديقات في أقل من دقيقة , لكن ارتحتِ لها وارتاحت لك .. صح ؟ أنا : طيب ؟! دينا : وأنا ارتحت لهالبنت وأتوقع إنها ارتاحت لي .. خلاص يعني ما لكم حجة |12| .. أنا : يا (( دينا )) يا حبيبتي القضية ما هي قضية اعتراض وبس عشان تقيمين الحجة وينتهي موقفنا عند هالحد , ولا حتى تكلفين نفسك تشوفين هل حجتك هذي مقنعة ولا لا , بعدين افرضي أنه إحنا قبلنا بهالمبرر , وصرتِ صديقتها فعلاً , دور الصديقة أكبر من إنها تسمع وتستمتع بس ! دينا : ألحين أنتم وش تبون بهالسالفة ؟! ملاك : حقك علينا يا (( دينا )) يفرض علينا ننصحك .. دينا : خلاص خلوها وكل شي بكرة يكبر ويبين .. لا تشغلون أنفسكم , ولو صار شي أعتقد أنه لي عقل أفكر فيه ورح أعرف أتصرف .. على كلٍ .. أنتم شكلكم ما عندكم محاضرة الحين ؟ ملاك : لا .. بريك ساعتين الله يعين عليه .. دينا : أوكي أجل أنا عندي محاضرة الحين , وتأخرت بعد ,الله يستر لا تجي الدكتورة وتطردني .. يالله أشوفكم بعد المحاضرة .. أنا : أوكي .. ودقي عشان نقول لك وينا فيه .. دينا : أكيد .. ... راحت (( دينا )) , وبقيت أنا و (( ملاك )) نتبادل النظرات , وكل وحدة في نفسها كلام ودها تقوله .. ملاك : (( الشمس )) سالفة دينا ماهي مريحتني أبد |11|... أنا : وش بيدنا نسوي ولا سويناه , شفتيها رافضة النقاش تماماً .. ملاك : لا يا عيوني , أنا ما أقصد السالفة هذي وبس .. صحيح إن اللي صار لنا معاها قبل شوي هو اللي أكد لي إحساسي , بس ... أنا : بس إيش (( ملاك )) ؟ منتِ مرتاحة منها .. صح ؟ ملاك : تبين الصراحة إيه .. يعني (( دينا )) لاقيها بالسوالف والضحك , لكن لما يتعدى الأمر هالحد ألاقي نفسي أصطدم بحواجز كثيرة .. باختصار البنت ماهي مريحة وصعب إنك تتعاملين معاها .. أنا : مو كل الناس يا (( ملاك )) تقدرين تفهمينهم بسرعة , فيه ناس ما تنسجمين معاهم إلا بعد وقت , لكن مو معنى هذا إنك تسكرين الباب في وجه أي شخص من هالفئة .. أعطي الناس فرصة حتى تشوفين منهم خطأ واضح , لا يصير اعتمادك على شك وبس , وغير كذا إنتِ مطالبة ببذل مجهود في فهمهم و اكتشاف الطريقة اللي تنفع في التعامل معاهم .. وفي هاللحظة دق جوالي .. أنا : هذي (( دينا )) .. آلو .. ! دينا : أهليـــــــــن .. هلا والله (( بالشمس )) إللي مايعجبون فيها إلا الناس العباقرة بس .. أنا : شامة ريحة شماتة جاية من بعيد , (( دينا )) اقصري الشر إن كانك ناوية عليه , وروحي لمحاضرتك لا تفوتك , بس بعد ما تقولين لي وش السالفة طبعا |12|.. دينا : يا شيخة والله كنت أشوفك شي , وطلعتِ للأسف مو شي .. أنا : ما رح أرد عليك لين تقولين لي وش السالفة .. يالله دينا لا تخليني مثل اللي مو فاهم ولا شي .. دينا : وإنتِ أصلاً مو فاهمة شي |12| .. أنا : (( دينا )) هذي آخر فرصة لك , تقولين ولا أسكر ؟ بس عشان تعرفين إني شديدة إذا لزم الأمر .. دينا : ألحين كم مرة لازم أقول لك ابعدي عن العصبية ؟ لا حول ولا قوة إلا بالله , طيب رح أقول لك السالفة وأمري لله , ولو إني ما بعد شبعت شماتة , لكن الشكوى لله , ولا الفرصة ما تتعوض ... هذي الله يسلمك , المعجبة إياها , وقفتني وأنا ماشية , وقالت : لو سمحتِ , لو سمحتِ .. معليش باخذ من وقتك ثواني وأسألك .. الحين صاحباتك الثنتين هذوليك , خوات ؟ يوم جاوبتها قلت لها لا .. قالت : غريبة !! دايم أشوفهم مع بعض !!!! ياعاااالم وش هالذكاء كله والعبقرية اللي ماقد شفت مثلها , ذكرتني بالمدرّسة اللي سألت بنتين عن أساميهم , ولما شافت أنه لهم نفس الاسمين , قالت : ما شاء الله خواااات ؟!!! صدق لا قالوا الطيور على أشكالها تقع , على الأقل خل يعجب فيك أحد عليه القيمة , مو وحدة تستغرب ليش إن اللي يجلسون مع بعض دايم مو خوات !!! أنا : و مبسوطة حضرتك هاه ؟ دينا : طبعاً مبسوطة فيه أحد ما ينبسط بعد هالاكتشاف الخطير ؟! أنا : أصلاً هي نظرتها كانت أبعد من نظرتك , قدرت تشوف شي إنتِ ما شفتيه , قدرت تميز عمق العلاقة بيني وبين (( ملاك )) واللي مستحيل إنها تتكون في شهر بس |14| دينا : طيب صاحبات من أيام الثانوي , دارسين مع بعض , بنات جيران , أصلاً الخوات ما يجلسون مع بعض , يعني أختي في وجهي في البيت , وفي الجامعة كمان ؟!! معليش (( شموسة )) فلسفتك هالمرة ما تمشي علينا .. يالله هارد لك وحظاً أوفر في المرات القادمة |14| ... أنا : أشوف فيك يوم (( دندونة )) دينا : الله لا يقوله , يالله باي عشان ألحق , ولا تتحطمين أرجوووكِ .. أنا : باي والوعد قدام .. .... >>>>>> يتبع |
|||||||
ضاجة كطبل
|
||||||||
02 / 06 / 2002, 25 : 06 AM | #2 | |||||||
سفير الوئام
شكراً: 0
تم شكره 0 مرة في 0 مشاركة
|
تابع
وأول ما خلصت من مكالمتي مع (( دينا )) بديت أحكي لـ(( ملاك )) السالفة , وما أمداني أخلص منها , إلا (( دينا )) تدق مرة ثانية .. أنا : آلو ! .. دينا : أيوة (( الشمس )) صديقتي العزيزة .. أنا : لا خلينا الصداقة لهذيك الجديدة |14|.. دينا : يالله عاد (( شموسة )) أنا : ماعلينا , وين المحاضرة ؟! دينا .. إهئ إهئ |8|.. أنا تهزأت , بس تكفين لا تضحكين.. أنا : طردوك إن شاء الله ... !!! دينا : (( شموسة )) أوعديني إنك ما تضحكين علي .. أنا : وش قلتِ ؟ عيدي ما أسمع ... !! ما أضحك عليك ؟ إلا بضحك وأموت من الضحك بعد ... نييياااااهههههاااا يالله خلصينا وتعالي , شوفينا جالسين في نفس المكان اللي تركتينا عنده .. ... وجت (( دينا )) وبعد ما شبعت من الضحك والشماتة , تغيرت السالفة , وتكلمنا في مواضيع ثانية .. حتى خلص البريك ورحنا لمحاضراتنا .. .... مرت الأيام , واستمر الحال على ما هو عليه .. ما خلصنا من نظرات المعجبة العبقرية , وترززها قدام وجهي في كل مكان أكون فيه .. وكمان (( دينا )) مع البنت الغريبة , سوالف كل مالها تتوسع , وتشمل تفاصيل أدق في العلاقة اللي بين الغريبة وصديقها , و(( دينا )) ما هي راضية تسمع مننا .. وكنت أنا و (( ملاك )) نترقب بس نهاية هالسالفة , وش بتصير , لأنها كانت محيرتنا من جد |11|.. وصل الأمر إلى إن البنت الغريبة , تاخذ رقم جوال (( دينا )) , وصارت بينهم مكالمات تخوض في نفس الموضوع , واللي ما كان فيه شي مريب غيره .. وبعد مرور ما يقارب الثلاث أسابيع حدث شي ما كنا نتمناه على الإطلاق , ومع تزامن البدايتين , تزامنت النهايتين بعد .. ! ...... كيف انتهت القصتين , وفي صالح مين كانت النهاية ؟!! هذا إللي رح نعرفه في الحلقة القادمة .. فكونوا معنا ... ...... محبتي الشمــــــــــس |117| [c]هامش أول شي أعتذر عن طول الحلقات , لأني ما قدرت أختصرها ! ثاني شي .. إللي ملّ من هالسلسلة - فضلاً لا أمراً - ياليت يرد ويقول أنه ملّ . .... [/c] |
|||||||
ضاجة كطبل
|
||||||||
02 / 06 / 2002, 24 : 08 AM | #3 | |||||||
سفير الوئام
شكراً: 0
تم شكره 0 مرة في 0 مشاركة
|
كملي كملي الشمس
القصه روووووعه:D :D :D شو صااااار:D |
|||||||
|
||||||||
02 / 06 / 2002, 14 : 02 PM | #4 | |||||||
ينتظر تأكيد البريد
شكراً: 0
تم شكره 0 مرة في 0 مشاركة
|
<..مرحبـا الشمس..>
اهلين..الشمس..
طــرحــك للمـذكرات.. أتضحت معالمـه في اولى الحلقات.. طــرح جميـل..وهـادف.. .... ابـداً: الســرد..<..متعـة المذكــرات..>.. بأنتظـارك.. شــكــراً تحيااتي |
|||||||
|
||||||||
10 / 06 / 2002, 01 : 02 AM | #5 | |||||||
سفير الوئام
شكراً: 0
تم شكره 0 مرة في 0 مشاركة
|
مرحبا ..
عاشقة , هداج شكرا |
|||||||
ضاجة كطبل
|
||||||||
10 / 06 / 2002, 44 : 02 AM | #6 | |||||||
وئامي فعال
شكراً: 0
تم شكره 0 مرة في 0 مشاركة
|
حلوه
كأني لاحظت طرحك للموضوع الرابع خل نلحق عليه |
|||||||
حبيبي لو رحلت بعيد بعيش أوفا من ظنونك***يمر الوقت من عمري ولا بدل غلا ودك
|
||||||||
مواقع النشر (المفضلة) |
الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
مذكرات طالبة جامعية (6) | الشمس | ملتقى الأصدقاء | 3 | 13 / 02 / 2003 31 : 02 AM |
مذكرات طالبة جامعية (5) | الشمس | ملتقى الأصدقاء | 16 | 12 / 02 / 2003 02 : 10 PM |
مذكرات طالبة جامعية (4) | الشمس | ملتقى الأصدقاء | 5 | 12 / 06 / 2002 27 : 12 AM |
مذكرات طالبة جامعية (2) | الشمس | ملتقى الأصدقاء | 12 | 02 / 06 / 2002 26 : 06 AM |
مذكرات طالبة جامعية (1) | الشمس | ملتقى الأصدقاء | 13 | 27 / 05 / 2002 38 : 05 AM |