لو الأماني تعطي الرجـال كـل اللـي يبيـه = مانمسي الا والطموحـات الكبـار مسنّعـه
ولو الظروف تروف واللي يبتلي تحسن اليه = ماكان في كل أربعة أشخاص يِبْلـون أربعـه
هذي حياه يعق بعض الناس فيهـا والديـه = والبعض الآخر لاقطعه أقصى المخاليق افجعه
ياليت تجرا ياخفوق تقول وش حنّـا عليـه = اللي معذّبنا نجـي ضـدّه أو نوقّـف معـه
الوقت مثل الكلمه العوجا على لسان السّفيه = ميتين في الميّه لها ربكـه وتحـدث قرقعـه
قد قالها راعي المثل وأنا أجزم ان رايه وجيه = الوقت مثل السيف أمـا يقطعـك أو تقطعـه
هذي ثلاث مْن العمر مالَمْسَت ايديني يديـه = ولاقدرت آخذ من لسانه أوأطـرق مسمعـه
أحط عيني في عيونه واستشف الشوق فيـه = وأقصى حدوده لانوى التعبير /تحريك اصبعه
أول الأمر قلت : الحيا عايِقْه ومعطّـل مجيـه = وأكيـد ودّه نلتقـي وأشيـا كثيـره تمنعـه
لكن بعد ماقمت أميّز بين وجهـه والوجيـه = ملامْحَه فلّت علـى فرقـاي كـل الأشرعـه
من يومها وآنا أدوّر بيـن خلـق الله شبيـه = والخافق اللي يشتكي نقص المحبّـه أشبِعَـه
لكن خلاصة ماحصل حكمه واخذهـا يانبيـه = اللي يحبّك / حبّه أكثر / لكن ان باعك بِعَه !
فهد بن عبدان
.
.