يا صْبيّ لا تقهر الي تعب من شــانك=من صغرتك يا الجويهل وأنت بحضَيْني
غالي و أراعيك و أنهر كل من هانك=دايم على البال زولك ترقبه عيني
أرجيك تكبر و أشوفك خيرة أقرانك=عندي مليحٍ وعند الأجنبـي شينــي
تسعــة شهور جرى دمّي بشريـــانك=بين الحشــايا غذيتك داخل بطينـــي
خمســـة شهورٍ ترجـّفنــي بكرعـانك=والأوله بي نساةٍ و أمشــي هْويْنــــي
دافي حناني و درّي والحضن صانك=محدٍ فرق يوم جبتك بينك و بينــــي
كنّ الوجع بي ليالي شقـــة أسنــانك=والعيد يومه بدا يظهر لك سنينـي
جافيت أبيّك بسبة طولــة لســـانك=عقبك غدا من صياحك وينه و ويني
بالليل ألوحق على رجليك غطيانك=و النـــوم يحرم عليّـــه قبل ثنتينـــي
أرهيت لك بالعطا وأكرمت صحبانك= مطلبك ما ردّ لو كان ألف أو ألفيني
أكرهت أبوك و شرى لك مثل رفقانك=موتر و لأجلك حدِيته يركبه دينــي
وأول عقوقك تواجهنـــي بحقرانك=لامن وُمرتك تصعّر لي بخدينـــي
تعصي إلهك و تتبع شور شيطانك=وأنت متعلم تعرف الشين و الزيني
كودك تسنّع و تمشي مشية أخوانك=الكل قالوا رضا الله يوم ترضَيْنــي
أرجي صلاحك مثل عيلان عمّانك=ونْ كان تبغي رضى الله حبّ يديني