تشكي وانا اشكي من صروف الليالي= تبكي وانا ابكي من تصاريف الاقدار
ان كان تبكي فقْـد حبٍ وغـالي = قبلك فقـدت احباب من عز الاخيار
هـذا ولـد عمي وذا ولد خـالي = وهذا صديق وذا زميـلٍ وذا جـار
واقسى الفـراق اللي يهدّ الجبالي = لا من تفرّق حب عن حب باجبار
يبقـى خيـاله يتبعه كالظـلالي = ما يقدر النسيان لـو كان جبّار
ليه يـا زمن ابعـدتني عن دلالي = وحوّلت سعدي هم واحزان وامرار
اضعفتني من بعـد قوّ احتمـالي = ومن عقب ماني رابط الجاش صبّار
غديت هشّ القـلب مما جرى لي= ما اقدر على الصدمات لو كانت صْغار
لا من تذكّـرت السنـين الخوالي = يومي انا ويّاه في حب الاطهار
واليـوم راحت مثـل حلمٍ بدا لي = وراحت معاها امال واحلامٍ كبار
واصبحت كنّي من رقى خشم عالي= وفي لحظة زلت به الرجل وانهار
ولمّن تلفّت واثره بقـاع خـالي = ما حـوله إلا الجرح في القلب تذكار
ان جـرّ صوته جـاوبته العوالي = بين الرجا والياس يمشي للاخطار
مكتوب يا قلبي عليك الـوبالي= ومكتوب اعيش بليل ما يعرف اقمار
يا صعب تعويضه على كل حالي = ما ظنتي في البيض مثله ولا صار
الزين له وحده وطيب الخصالي= كامل مكمّل من مناعيرٍ احرار
وقف الزمن ضدي ولا رحم حالي = حيثي فقيرٍ لفقوا صعب الاعذار
الحب ما يعرف حـدود المحالي = لا من تحدّر سيل يجرف بلا انذار
وش ذنبها يفرض عليها النكالي = وش ذنب قلبي عايشٍ مرّ الاكدار
يالله ولا غيرك عليه اتكالي = تفرج لقلبينٍ بسجنٍ من النـار