أرسل لي أخي وصديقي فيصل الشريف هذه الأبيات
ضايق ومتعومس وحاير وتعبان=مدري وش اللي يا محمد يبيلي؟!
مليت وأيامي من أحزان لأحزان=جرّحت هقواتي ، وذبّحت خيلي!!
وأنت تعرفني زين يا بو فليّان=عاقل مع العالم ، وقلبي هبيلي!!
فكانت هذه المتواضعه ، أتمنى أن تنال رضاكم
يا فيصل إن كانك من الحزن شبعان=حزني قسم بالله ما هو قليلي!
تجمح بي الدنيا بلا سرج وعنان=وتضرب بحافرها ، وتصهل صهيلي!
أحاول أعسفها على قدر الإمكان=أبغى عدلها ، لكن إنها تميلي!!
أحزن بها وأخفي عن الناس الأحزان=أنا أشهد إني ببث حزني بخيلي!
فيها أقابل كل محسن بالإحسان=وأقابل المخطي بصبرٍ جميلي!
فيها أدوّر للحزن فيّ عنوان=وألقى حزن كل البشر ينتميلي!!
فيها أسافر مع خيالي للإنسان=اللي معه تطلق همومي سبيلي!
فيها أدوّرني(محمد فليّان)=الزارع اللي ما لزرعه حصيلي!
اللي على مر الليالي والأزمان=ليا لقى ممسى ، ما يلقى مقيلي!!
أبيني لو مانيب طربٍ وفرحان=ما أبغى شبيهٍ لي ، ولا أبغى بديلي!!
حتى لو إني عايشٍ عيش حرمان=يكفيني القلب الكريم النبيلي!
اللي يمد الحب من غير نقصان=ولا إنتظر شكرٍ لمده جزيلي!
لأجله يا فيصل بأرفع الصوت بألحان=وأقول لأيامي وهمي وويلي..
مهما يمر الوقت وتطول الأحزان=لا بد يطلق حزن وقتي سبيلي!!