بعد الغياب حبيت تكون اول الابيات غزليه رغم عدم تميزي في هذا الجانب لاكن عشمي فيكم ليس له حدود
[poet font="Simplified Arabic,5,black,bold,italic" bkcolor="transparent" bkimage="" border="none,4,gray" type=2 line=200% align=center use=ex length=0 char="" num="0,black" filter=""]
يا مرحبا ترحيبةٍ تنعش الحال=ترّجح بضلعان الفيافي والاطعاس
على هنوفٍ شوفها يشرح البال=يرو العروق اللي على القلب يباس
ابو عيون وساع نعسٍ وذبّال=في بحرهن كم راح سابح وغطاس
راعي ثمانٍ نورهن يشعل اشعال=صفٍ مصفا صافيٍ صف الالماس
ريقه محلا حاليٍ عذب وزلال=رشفه من الشفه تعادل مية كاس
يا عود ريحانٍ ليا اهتز ثم مال=تميل معه الشمس والارض والناس
ولا الردايف وصفهن يبحل ابحال=والقرن من راسه على الردف نكاس
لو قص من شعره وذره بالارمال=ينبت ثمر جنة عدن فوق الارماس
راع النهود اللي حسينات الاشكال= سبحان من صورك يا عذب الاحساس
احاه يا بعدك على القلب ولوال=واحاه يا بعدك عذابٍ ووسواس
واحاه يا بعدك بهاذيل وهبال=واحاه يا بعدك يبي يفجر الراس
ثم احاه يا قربك دوى كل غربال=واحاه يا قربك دوى كل الاتعاس
واحاه قربك عيد في كل الاحوال=واحاه يا قربك شكاله ونوماس
لو يشرب الماء بان بالحلق لاسال=حوريةٍ ما مثلها بين الاجناس
ياما حلا معها بدلّه وفنجال=في صحصحٍ يجلي عن العين الاتعاس
لا عاد لي بالجد والعم والخال=ولا عاد لي في واقفينٍ وجلاس
ابغي لطيف الروح وان قطت الشال=وبان الحلا من قمة الراس لساس
سبحان من فصل جسدها تفصال=ناعم ويثنيها هوى كل نسناس
لا يا بعد ذا الكون حرمه ورجال=ورعٍ وعود وكل من جر الانفاس