يا الله يااللي دايم الدوم نرجيك = تزيل عنا الشر والمكرهيه
يا رب يا معبودنا والخلف فيك = تجبر مصيبتنا عليك الشكيه
يا ربنا نركع ونسجد ونرضيك = تعوض فاللي ما رجينا مجيه
صلوا عليه الصبح يا قصرنا فيك = صلاة ميتٍ ما شرعله تحيه
شا لوك من قصرك لقبرك وبانيك = للموت ما لي يا سعد مقدريه
ما هو بلا هوش ولا مال نشريك = هذي تدابير الإله الرضيه
والموت لو أمهلك ايام قافيك = وليا وصلك الموت جتك المنيه
يا قصر ابن سكران هو وين راعيك = قال ارتحل والغرس خلاه ليه
قصراً لبن سكران حامي نواحيك = يومٍ علي موجود حامي مديه
يا قصر لا تبكي ترى العود يوحيك = العود يوحي ابكاك ما لك ادعيه
يا قصر لا تبكي ليا جيت ناصيك = ابكاك يبكيني ولا به زريه
يا قصر لو شديت والله ما اخليك = إني لزورك كل صبح وعشيه
تبكي على اللي شد يا قصر وابكيك = اليا ذكرت ابك العلوم الطريه
لا تحسبني يا قصر زاهدٍ فيك = و الله ماني ناسيك والروح حيه
يا قصر هذي دبرة الرب واليك = هذي تدابير الإله الخفيه
يا قصر يا زينك ويا زين إهاليك = والجار ما قد جاه منهم شكيه
يا قصر يا زينك ويا زين طاريك = طاريك يبرج روحي اللي خفيه
يا قصر يا زينك وما احلى قهاويك = كيف وسواليف الجماعه طريه
يا قصر يا زينك وما احسن سوانيك = يوم محاليك السباع الضريه
سوالفٍ مع الجماعه اتسليك = ما صبوا الفنجال من زمزميه
وانا اشهد إن الرب يا قصر حاليك = لا قالوا ان الصبح عيد الضحيه
يا زين شمس الصبح وإن شعشت فيك = عقب صلاة العيد ذبح الضحيه
ويا ما حلا نشر الدبش في مفاليك = من العرق إلين القصر كله ارعيه
يا قصر يا مابركن النضا فيك = يا ما برك فالسوق من صيعريه
فقيرهم عند المواجيب يقريك = وانفوسهم عند اللوازم غنيه
خلوك اهلك اللي تشيد مبانيك = يا ما اغرسو بك واحفروا كم ركيه
واللي حفر ساسك احفرله مقاديك = اهل السخا والدين واهل الحميه
دفنوا بحزم المقبره في نواحيك = يا الله عساهم للأجنان العليه
تقاصروا بالحزم عيوا ما هم فيك = تقاصروا ولا لهم فيك نيه
حياتهم راحت سواليف وانبيك = خذهم من السكران عجل المنيه
يا قصر لو شديت أنا لي رجا فيك = يشهد علي الله وتشهد ايديه
شالوني اعيالي وانا رغبتي فيك = شالوني اعيالي مع البندريه
لو قلت انا ما روح قالوا انخليك = وانا كبير السن حالي ونيه
لا شك جعل السيل يملى مغانيك = من بارقٍ من مزنةٍ عقربيه
يسقي اغروس فيك واثلك واراضيك = يا ما حلا ذيك الرجوم العذيه
يا قصر واللي واطي الناس واطيك = واللي قعد هاليوم يرحل قفيه
واللي كوى قلبي من الهم كاويك = والموت ما خلى حدٍ مرحميه
وصلاة ربي عد ما حل طاريك = صلاة ربٍ خص فيها نبيه
أنت غير مسجل في منتديات الوئام . للتسجيل الرجاء إضغط هنـا
قصيده 00000 ابكتني 000 (( يا قصــــــر )) 
