من وحي الثراث...قصص واقعية

السلام عليكم ورحمة الله وبركاته ..

صباح الخير ..

عدنا من جديد


هذي قصه جرت على رجل من مطير كان متزوج وصار بينه وبين زوجته عشره الفه ومحبه زايده

وكل واحدٍ منهم يحمل للثاني تقدير واحترام لكن الله مارزقهم بأولاد

وبعد ما مضى على زواجهم مده طويله صارو بعض الاقارب يتدخلون بينهم ويقولون للزوجه ..

كيف تجلسين مع هالرجال اللي مالله راد له ذريه وكانت ترد عليهم بان هذا شي كتبه الله

ولما كثر عليها الكلام والالحاح صارت تبكي ويوم درا زوجها عن بكاها سألها عن السبب ..

قالت..اولا :ابكي من تدخل الناس فينا .. والثانيه : على حظي اللي ماجاد لي بمولود

قال لها زوجها : خذي كل اللي تبينه من البيت ثم وداها لاهلها ..

ولما رجع حس بلوعة فراق زوجته اللي كانت تعامله بوفاء واحترام فقال ..



كنـيـت ما بالقلب يا عناد و ازريت
.. .. .. يا عــنــاد ودو لعـشـيــري سلامي

لا والله الا روحــت نـــورة البيت
.. .. .. الـنـور راح وصار بيتي ظلامي

اللي تهلي بي الى رحت وان جيت
.. .. .. و تزود لي بالطــيب في كل عامي

لامــن ردا مـنها و انــا ما تـرديـت
.. .. .. و الكل مـنـا ماشـــــــيٍ بأحترامي

و لايستوي علمٍ على غـير تـثـبـيـت
.. .. .. و لا تصلح البـنـدق بلـيّـا حــزامي

عز الله اني عـقــبـها مــا تهـنـّيــت
.. .. .. و العـيـن عــيّـت لاتــذوق المنامي

و عز الله اني في هـــواها تـبـلويت
.. .. .. من عقبها حــالــي طــواه الهيامي

وده تزايد كل ما اصبحـت و امسيت
.. .. .. في وســط قلبي باني ٍ له اخـيـامي

يا ونـتــي من يوم قــفــا و انا اقفيت
.. .. .. ونّــه كـما ونـّـة كســير العظامي

حــيـّاه رب ٍ خالـق الحي و المـيـت
.. .. .. يا ودكــم مـا انســاه دايم دوامي

اقولها في بنت ربــــــع ٍ عـنـاتـيـت
.. .. .. رجالهم يـثـنـي نــهــــار الزحامي

جـبرت نفسي حـشـمـــةٍ ما تزريّت
.. .. .. تـكـفـا يا عـاتـق عـقبنا لا تضامي

وانهمك يا عواض لاتقول ما اوحيت
.. .. .. حاذور يا عـواض نِـسب الخمامي

ثم اسـمـحــولي كان يا نـــاس زليت
.. .. .. راع الــهـوى عن حالته ما يلامي

يقطعك يا حـــــظ ٍ ورى ما تـعلـّيـت
.. .. .. انـهــضــك و انـته ماتريد القيامي

ماينـفـع المخلوق لو قــــــال يا ليت
.. .. .. ولا سـر في ما فات كثر الكلامي


نافع المطيري

.








.

بكل الووود

0
0
0

حسبي على من فرق بين قلبين

محزنه 00 الله يعوضه خير

تسلمين ياكل الذوووق

0
0
0

تحياااااااتي

هذي قصة قديمة عن رجل من الروقه من قبيلة ( عتيبه) يقال له .. السعيدي
وهو رجل صاحب غزوات ومعروف عنه الشجاعة ، وله فعول تذكر..

بعد ما كبر في السن ألزم عياله أختهم بالجلوس عنده وخدمته وكانوا بارين فيه
فكانت بنته تشيله على متنها لقضاء حاجته وترجعه مكانه في بيت الشعر
وهي دائماً عنده ، تغسله وتخدمه .. وكان أكثر وقته معها .. تمزح معه وتسولف عليه ..
وكثير من الاحيان يجون عندها الحريم وهو موجود، وعلى كبر سن هذا ( الشايب ) الأ أن نظره زين
بس .. ما كان له هيبه عند الحريم .. لكبر سنه .. يعني ( مايستحون منه ) ..

وفي يوم من الايام جاهم سيل وجاء بنات عند بنته وقالوا لها لازم تروحين معنا عند الغدير
نسبح فيه ، فأعتذرت علشان .. أبوها . وقالوا لها : نشيله معنا وأذا أنتهينا نرجعه
وفعلاً خذوه معهم .. وجلسوه عندهم .. وسبحو .. وهو يشوفهم .. وتحرك قلب الشايب للنسوان ..

قال السعيدي وهو عند الغدير يشوف البنات يسبحون .. ويتذكر شبابه واللي هو فيه آلان ...



يقول السعيدي والـذي زاد همـه
.. .. .. .. .. .. رقاد الــضحا عقب ارتحال النجايب

غديت جليس للنساء مـا تهابنـي
.. .. .. .. .. .. وأنا أشوف في غراتهن العجايـب

يشيلونني من فيـه صـوب فيـه
.. .. .. .. .. .. من عـقـب برد أظهور هجن دوارب

ما عاد ارجي قرعـة الطـار ليـه
.. .. .. .. .. .. على عرس عمهوج طويل الذوايب

ولا عاد راجي سجة الهجن بالخلاء
.. .. .. .. .. .. على الطمع وأنا عقيـد الركايـب

قالوا لي الا نذال شرابـة الـرداء
.. .. .. .. .. .. .. وراك ما تبطـي بنـا بالمغايـب

قعدت بهـم بالبـر تسعيـن ليلـة
.. .. .. .. . .. .. أقودهـم قـود الجمـال الجلايـب

يـوم شبـان تهـزوا بفـاطـري
.. .. .. .. .. .. يقولون له فاطر وراعيـك شايـب

كم عقلة بالدو مـن كسـب بكـره
.. .. .. .. .. .. وكم جاب راسي من مغيب لغايـب

يقول : ما بالربع مثلي ونضـوي
.. .. .. .. .. .. و هو خابر أنـه يعلـم الله كـاذب

ذلوله مـا يـروح عليهـا لربعـه
.. .. .. .. .. .. وهو أول مصبوب له الماء وشارب

بعيد من الطاهي قريب من الغـداء
.. .. .. .. .. .. كبير المدحاء في مناحـر ركايـب



ويوم رجعوه للبيت .. طلب من أعياله أنهم يزوجونه من وحده من البنات اللي كانوا عند الغدير مع بنته لأنها كانت جميله ..
وألح عليهم في الطلب .. ومن برهم فيه طلبوا من عيال عمهم أهل البنت الموافقه على زواج أبوهم من البنت .
فطلبوا مهر لها ( فرس ) مشهوره في ذاك الوقت تساوي ( أربعين ناقه ) وقبلوا عياله هذا الشرط وزوجوه
بس عيال الشايب أشترطوا أن أبوهم لاجاء يدخل على البنت يخلون النسوان يضعون الشايب على البنت وأنها ما تحرك وهذا زيادة في برهم لبوهم .. وصار لبوهم بعض الحركه في ذيك الليلة توفى الشايب وهو فوق البنت .. فدعت هي الحريم .. وأشهدتهم وهو على حالته فعرفوا أن هذا أمر الله ....

بعد فترة تزوجت البنت من رجل ثاني وأنجبت ولد ..
ويوم كبر الولد صار يروح يلعب مع الاولاد ، وكان كل ما صاح هذا الولدألتفت قلب واحد من عيال الشايب له ..
وكم مرة يصير لولد الشايب هذا الشيء ، أنه كل ما صاح ولد البنت .. يفزع قلب ولد الشايب له ..
وتعلق قلبه بمحبة هذا الولد وصار يعطف عليه ..
وبكذا .. أستدل بالصوت والمحبه أن هذا الولد أخوه من أبوه اللي هو ( الشايب )
ولكن الناس قالوا مايصير من أبوك لانه مات في نفس الليله اللي دخل فيها ..

طالة السالفه بينهم ، حتى أنه كان بيصير مشكلة على هذا الولد ، وشاروا عليهم أنهم يروحون لواحد مشهور بالمعرفة والحكمة في ذاك الوقت .. يقال له ( أبن ثعلي )
وفعلاً راحو له وحضر الولد وأبوه ولد ( الشايب ) اللي يدعي أن الولد الصغير أخوه عند ( أبن ثعلي )
وكانت غنمه في المرعى ومعها بنته وكان أسمها ( العارفه )
وقال لهم ( أبن ثعلي ) : أبي واحد منكم يجيب لنا ذبيحه ويكون حذر مثل الذيب يخطف لنا من أدنى الغنم بدون ما تحس به البنت ..
قال الولد الصغير أنا .. وراح الولد وصار يخايل البنت من بعيد وهو ملابس للارض حتى صدت وخطف له شاة وحطها على متنه ولا يطأ ألا على الحصا علشان مايبين أثر رجليه وجابها لهم
ويوم أفقدت البنت الشاة .. قامت تدور على أثر.. ماتدري هو ذيب .. أوغيره ..
مالقت شيء ألا نصف ماطأ قدم بين حصاتين وأحتارت في الامر ..
ورجعت لبوها لقت عندهم ضيوف .. وقالت لبوها أنه ضاع منها .. شاة .. قال لابد أنك تعرفين مصيرها
قالت : مالقيت من العلامات ألا نصف ماطأ قدم بين حجرين ..
قال لها وش ظنك ؟
قالت : أظنه ذاك الولد البتر ، عصارة عود قد فتر ، من بنت بكر ..
قال للمتحاكمين : عطوني حجتكم .. فقام كل مهم وقال حجته ..
قال ( أبن ثعلي ) : هذا غيب ولا يعلم الغيب الا الله .. والولد هذا بيسوي بينكم فتنه وحرب ..
لكن أنا بقسمه بينكم أنصاف حتى لا يجي بينكم أكثر من كذا
قالوا : مايصير ماهو ذبيحه تنصفه بيننا . . ولاكن نبي حكم غير هذا ..
قال أنا مازهمتكم أنتم اللي جيتوني بأختياركم ولانتو رايحين من عندي ألا منتهين ولو بالقوة ..
فطلب أن يمسك كل واحد منهم بيد من أيدي الولد وهو شاهر السيف وكل ما هوى عليه أطلقه ولد ( الشايب )
وصار يتوعدهم أن اللي يفكه بتجي الضربه فيه ..
وكررها ثلاث مرات وفي كل مرة ولد ( الشايب ) يفكه ،أما اللي يقال أنه أبوه كان يمسكه
فعرف ( أبن ثعلي ) أن اللي كان يفكه أخوه من أبيه ( الشايب ) والسبب ... رحمته له وعطفه عليه ..
والسبب الثاني .. كلام البنت ....
فحكم أنه .. أخو ولد ( الشايب ) وعطاه اياه ....

الغاااليه سديم

قصة رااائعة بكل ما تعنيه الكلمه

سمعت بها من قبل ولكن لم احصل على القصيده ولم اجدها الا هنا

فشكرا لك من كل اعماااق قلبي

وراااح اسمعها الوااالد (طبعا القصيده)

والا القصه ما راااح اقولها له اخاااف يسوي سواااة الشااايب

تحياااتي يا غاااليه

العفو .. ابو رهف ..
بس مالك حق تحرم الشايب هههههههههههههههههههههه



في زمن ما وفي مكان ما كان هناك عشيرة ذات مركز وجاه بين العشائر يتولى قيادة هذه العشيرة رجل
وأولاده الثلاثة وكانت هذه العائلة تعيش في سلام وود وترابط وتعاون ، ومن أمثلة التعاون في ما بينهم
انه كلما فاق الأب من نومه في الصباح الباكر ردد بيتا من الشعر بصوت عالي يخاطب فيه أبناءه وهو ..

صبح جديد وتو نوره طالع = وش فعلكم لي يا عيال منيره

وكان يرد عليه الابن الأكبر ((علي )) ويقول

ما تنبت النبته بدون الزارع = زرع زرعته يايبه خذ خيره

ويرد عليه الأخ الأوسط (( عبدالله )) بنفس البيت وأيضا يرد عليه الأخ الأصغر (( حمد)) وهو المقرب إلى أبيه
بنفس البيت ولكن كان يزيد عليه ويقول

ما تنبت النبته بدون الزارع = زرع زرعته يايبه خـذ خيره
ولخوتك شاري ولاني بايــــع = يا والدٍ درب السنع تدبيــــره
علمتنا نكسا الضعيف الجايع = علمتنا اصل الكرم والجيـــره

وكان الاب يقول هذا البيت وهو في شقه وكان أولاده يردون من أي مكان كانوا فيه ماداموا يسمعون نداء أبيهم
ويبدأ يوم جديد بالمحبه والتعاون ويذهب كل ابن الى عمله .. علي و عبدالله يتولون أحوال الرعيه والغنم والماعز
أما حمد فكان يهوى الأبل وكان المسؤول عنها وهكذا يوزع العمل في ما بينهم بسبب كثره الحلال
مما أثار الحسد في بعض قلوب الحاسدين ومنهم ((سعد))

سعد هذا ليس من أهل هذه العشيرة ولكن قد جلى من عشيرته بسبب مشاكل قد احدثها فيها ولم يكن لسعد اولادا
مما زاد ناره وغليله وكان سعد كلما راى هذا الحلال لدى ابوعلي تاكله النار من الحسد وكان قاطعا على نفسه
وعدا وهو ان يغير حياة هذه الاسره الآمنة

تقرب سعد من هذه الاسرة وبالأخص من حمد إلى أن زوجه ابنته وطبعا كان زواج مصلحه ..
ومع ان ابوعلي كان يشك في سعد ، ولكن لم يرى منه شيء

وفي يوم من الايام طلب سعد من ابنته ان تسرق خنجر حمد وتعاونت البنت مع ابيها وسرقت الخنجر
واعطته ابوها وفي نفس الليله تسلل سعد لبيت ابوعلي وطعنه في بطنه وهو كاتم صوته
عشان مايسمعه احد وترك سعد خنجر حمد في احشاء ابيه وهو يظن انه قد مات وكان الوقت مقاربا للفجر
والاب ينزف وصدف ان سمع حمد صوت من جانب بيت ابيه فذهب ليرى ما حدث ولما دخل البيت وجد ابيه
ممددا وهو ينزف و راى حمد خنجره في احشاء ابيه فذهل ولم يعرف ماذا يفعل واخذ يصرخ و يون من ما في
صدره ولما سمع صوت علي و عبدالله وقد قاما من نومهما ليروا ما حدث فارتبك حمد لأن اداة الجريمه
هي خنجره وكان يعلم ان علي وعبدالله سيقتلانه دون استشارة لان الخنجر لايؤخذ من صاحبه دون علمه ابدا
في ذلك الوقت وركب حمد حصانه الى جهة غير معلومه وهو يردد ويقول ..

طعنت يا خنجر فواد عاش لي = ياخنجري وش فيك خنت اللي مضا
يومك تتبع امهات الجــــادلي = يازين شوفك بين جــــمرات الغضا
اكبر بلا إنه يعاديني هـــــــلي = ما عاد لي يا كود صحرا او فضــــا

وكان حمد يردد هذه الابيات والدموع تنهمر من عيونه حزنا على ابيه الذي لا يعرف ما هو مصيره
و بعدما غادر حمد القبيله والحزن يملا صدره وهو لا يعلم وجهته كان يظن ان ابيه قد فارق الحياة


اخذ علي وعبد الله ابيهم الى حكيم يبعد عن ديارهم ليعالج ابيهم من غيبوبته فقد كان في غيبوبه كامله
ولم يكن يعى ما يحصل حوله وكان سعد يتمنى ان يموت لكي لا ينكشف امره .. وبعد ايام وحمد جالس
في غار لجاء اليه ومن بعد الحياه السعيدة سمع عوا ذيب وهو قد افتقد الاصوات ولم تعد لحياته أي معنى فقال ..

من اولٍ مــاني ادور للــونس = واليوم نفسي تفرح بذيبٍ عوا
عزي لرجلٍ خانه الدهــر وعبس = ثمٍ تقطع خافقه ثم انشــوا
ان كنت عارف من خويك فحترس = المشكله لا لف زندك والتوا

وبعد ليالٍ عده فاق الاب من غيبوبته عند الحكيم وقال بيته المعتاد والذي يقوله كل صباح ..

صبح جديد وتو نوره طالع = وش فعلكم لي ياعيال منيره

ولكن لم يرد عليه احد لأنهم ذهبو للقبيله فعلم ان حمد ليس هنا لانه لو كان هنا لما فارقه دقيقه ..
ونزلت دمعه ضعف واسى من الاب وقال

ياليت نجفة طاعني في صدري = وياليتني وسط الثرا مدفون
واصبح وحيد وميت في قبري = ماني وحيدٍ والملا يدرون

فاخذ الحكيم يهون على الاب مافيه ويتحمد له بالسلامه وقال الحكيم للاب اتريدني ان ارسل في طلب اولادك ..
فقال الاب لا بل ارسل لهم هذه القصيدة ولا ياتون إلا اذا نفذو ما فيها وقال ..

ارسل ابياتي لكم يامسندي = يارجال العز فاليوم الصعيب
ذيب وقتي عاويٍ دوم يحدي = يطلب الفزعه ويطلب له مجيب
بانت الخله مع الحيل الردي = يالنشاما افزعوا جرحي عطيب
حالف بالله لفارق مرقدي = لين راس المعتدي مني يشيب
والله ان يمحيه برقي ورعدي = والله ان منفاه للنجمه قريب
سار في درب العدو المعتدي = حاول الفرقا و لا ظني يصيب
عزوتي فيكم علاجي لزهدي = وابغي علاجٍ به جروحي تطيب
دوروا له في بيوتٍ تسنـدي = للعقول اللي تحظر ولا تغيب

وارسل الاب القصيده الى اولاده ولكن لم يفهموها فذهبوا لرجل كبير في العمر وكان من اعز اصدقاء
ابيهم وقالوا له القصيده فلما سمعها قال ان ابيكم كان كلما ارسل لي قصيده لايريد لأحد أن يفهمها غيرى
كتب لي بحروف اول الابيات وقال الرجل الكبير اجمعوا كل اول حرف من كل بيت فلما جمعوها
اصبحت جمله وهي _اذبحوا سعد _ فعرفوا بان سعد هو من طعن ابيهم فذهبوا له واسمعوه القصيده وقتلوه
وذهبو لابيهم وذهبوا لياتوا بحمد واعلموه بما جرى واجتمع الشمل


يقال انه قصه خياليه .. بس مدري

.







.

الراااقية دائما وابداً (إن شاء الله)

سديم

قصة من اروع ما قرأت

حتى وإن كااانت من نسج خيااال الباااديه

الا انها تحمل في طياتها الكثير من المعاااني الساااميه

سلمت يداااك اخيتي

وابقااااك الله

ذخرا لوئااام واهله

لك مني اخيتي

صااااااادق التحايا

الراااقية دائما وابداً (إن شاء الله)

سديم

قصة من اروع ما قرأت

حتى وإن كااانت من نسج خيااال الباااديه

الا انها تحمل في طياتها الكثير من المعاااني الساااميه

سلمت يداااك اخيتي

وابقااااك الله

ذخرا للوئااام واهله

لك مني اخيتي

صااااااادق التحايا

بسم الله الرحمن الرحيم


السلام عليكم ورحمة الله وبركاته


سديم الكون

ربي يمدك بالصحة والعافية


قصة رائعة وفيها كثير من المواقف

ولها حبكة درامية تشد وتجبر على المتابعة حرف حرف

استمتعت بها وأعجبتني نهايتها

كل الشكر والتقدير لجهودك الواضحة في كل الوئام

يسلمك ربي .. ابو رهف

وشكرا للمتابعه والاطراء

الله يسلمك ويعافيك .. سندنا

شكرا لحضورك