[الشمس ●]

صباح الخير
رد على السريييييييييع على موضوعك فطامي وبس

ياعيني عليك ياملجلج يعني انت كذا رجعتنا لنقطة الصفر , وأنهيت الفلم نهاية سعيدة ..
تسؤ ..
مايعجبني الحال كذا , مافيه آكشن .. امممممممم
طيب خذوا مشكلة جديدة راح تتوهق فيها عبير .. :p

**********************************


عبير وقفت عند الموظف اللي قال لها رقم البوابة الللي انتقلت عليها الرحلة .. وطبعا لأن عبير ماتدبر شي , وخافت إنها تضيع مرة ثانية , طلبت منه إنه يوصلها للبوابة المقصودة ..
وقال لها على أمرك أبشري , وفجأة يتذكر أنه مكلف بشي ولازم يسويه ..
نادى على واحد من زملاءه , وقال له وصلها .. وقال لعبير قولي له رقم البوابة ورااااااح ..
الزميل : هاه طال عمرك , أي بوابة ?
عبير : بوابة رقم ست طعش , وهي كانت تسع طعش ..
الزميل : طيب تعالي وراي ..
وراحت وراه وحكى للمضيف سالفتها , ودخلها المضيف , وطلبت عبير تشوف أهلها , رد عليها المضيف وقال : أنه المقاعد مرة زحممممة .. اجلسي هنا بعد ماتقلع الطيارة أوديك لهم ..
وووووبعد وقت أقلعت الطيارة .. وجا المضيف يسأل عبير وش اسم الوالد عشان ينادي عليه ويجي يستلمها .. وبعد ماعرف الاسم , ونادى عليه .. ونادى .. ونادى .. ولا من مجيب ..
سألها : آنسة عبير انت متأكدة أنهم على الرحلة هذي ؟!
عبير : مو هذي رحلة استراليا ؟!!
المضيف : لا هذي متجهة إلى أسبانيا


اووووووووكملوا .. :D


************************************
للمعلومية عبير مدبرة حالة اقتصاديا .. جامعية , ولها مكافأة تحولها مباشرة على حسابها في الأمريكي ..
اوووو معاها موبايل معمم تقدر تستخدمه في أي مكان ..
هذا بالإضافة لبطاقة الفيزا ..
ولغتها تماااااام تمشي حالها ..
يعني مشوها ولا تحبكونها وخلوا فيها إثارة شوي :p
تقدر تاخذ راحتها يومين حتى يجون لها أهلها ياخذونها :p

أنتظركم ..

سلام ..

الشمس

[ملجلج ●]

هلا بالشمس....

مسكينة عبير وش مسوية لك /// عشان تسوين فيها كذا ...

ما صدقنا نردها لأهلها الا تقومين و تضيعينها مرة ثانية ....

على العموم حلوة التكملة .......



و ننتظر الفارس أو الفارسة الجديدة ........

[فطامي ●]

هلا والله شموسه وملجلج تكمله رائعه تسلمون اعزائي ..

وبناء على طلب شموسه راح اكمل بالطريقه اللي تبيها ..:D:D

لما درت عبير ان الرحله هذي مورحلتها صار فيها احباط لبعض الوقت تالي طرت على بالها فكر ه .. انا الحمد لله عندي فلوس واعرف لغه ومعاي موبايل ..(( شموسه ماخلت فيها مجال :D )) وفوق هذا احب المغامره وانا موصغيره ليش ما اخذلي فره باسبانيا دام اني فيها واروح اشوف مصارعة الثيران واركض وياهم اخلي الثور يلحقني (( هذا باسبانيا ولا انا غلطانه )):D .. اي والله شوراي اهلي ماحاتوني انا احاتيهم !!?? ..:D

حضرة المظيف .. انا خلاص بكمل الرحله وماله داعي تتصل بالمطار ..
طيب اهلك اخاف يقلقون عليكي.. لا ما عليك اهلي ناسين اني بسافر وياهم اصلا ..

الله اخيرا جيت لاسباني .. عندي فلوس وبطاقة الفيزا الخاصه بابوي خلاص عيل بروح للشيراتون واقعد باغلى جناح ..:D

لوسمحت يا جرسون .. جيبلي الدليل السياحي الخاص باسبانيا ..

او كي .. عندهم مصارعة ثيران الساعه 8 وبنفس الوقت راح يبدا عندهم ملاحق الثيران بالشوارعه .. اي واحد اروح انا احب الاثنين ؟؟؟ !! انا محتاره

وين راحت عبوره وشصار لها بعدين ..

يالله كملو ..:D

[الشمس ●]

مررراااااحب ..
تصدقون أعجبني الموضوع ..

تدري ياملجلج المشكلة إن النهايات تبع الأفلام الهندية ماأحبببها ..
ومو مشكلتي إن فطامي خلت عبير هي البطلة .. روح تفاهم مع فطامي أنا مالي شغل

ويحلي أيامك ربي ..

** ** ** ** **

فطامي ياهلا .. إنت كذا
على فكرة لازم البنات يتدربون على حالات مثل هذي ويجمدون قلوبهم شوي , تصدقون أعجبتني الورطة هذي , أروح للطيارة الخطأ وتصدف وتصير شوق حبيبتي الغائبة معاي ..
تكمممممل :D
إيه يالله نكمل ..

____________________

تدرون مشكلة عبير إنه راسها مقلوب من الله خلقها , ولا فيه بنت بالدنيا تحب تتفرج على الثيران , والألعاب العنيفة عموما ؟؟
يالله مانشره عليها ..

نزلت عبير من الأوتيل وهي مقررة تحضر سباق الثيران اللي بالشوارع .. ومين قدها عبير في أسبانيا , وهي تمشي ومعاها الخريطة لا تضيع بعد .. , ومركزة بقوووووة في الخريطة وتطالع أسماء اللوحات اللي بالشارع ..
إلا وتصدم لها بالغلط في واحد , رفعت راسها تشوف مين , وشافت شاب وسيم , بملامح عربية .. يووووووه توهقت وخاااافت .. قامت تعذر له ..
سوري .. سوري .. شوي وبتبكي ..
رد عليها الشاب .. بالعربي وطمنها ..
طبعا عبير استجمعت قواها وسألت عن اسمه وبلده وسنه :p
واكتشفت أنه مغربي مقيم بأسبانيا .. اووووو عزمها على كوفي وراحت معاه (قلبنا الفلم رومانسي , افرح ياملجلج .. ) .. وطلبت منه أنه يمشيها بأسبانيا , اوووو قال لها أبشري من عيوني ..


____________________

يالله عاد كملوا وش دار بينهم في المقهى , وعلى إيش اتفقوا وش صار بعد .؟؟؟


سلام
الشمس .. ( أحسن وحدة تكتب قصص أفلام آكشن ورومانتيك اوووو تخرجها وتنتجها بعد :D )

[فطامي ●]

هلا والله شموسه تكمله حلوه والظاهر بس انا وانتي اللي بنكمل حتى ملجلج اختفى ..

بعد ما عزمها على كوفي شوب لف فيها بحلبات مصارعة الثيران تالي وداها الاماكن الطيبيعيه هناك ووعدها انه ياخذها جوله باكر الصبح على الاسواق .. مومعاها فلوس عيل خلاص ايدها تحكها بتصرف ..:D

وصلها الشيراتون وقالها تصبحين على خير .. راحت غرفتها وهي تفكر بهالشاب الغامض اللي توها تعرفت عليه ويبدو لها انه شاب لطيف وقالت ياترى شلون اهلي الحين وشمسوين .,. لحظه .. انا معاي موبايل خنتصل عليهم .. وييييه الموبايل خالص شحنه والخط ما ادري شفيه بعد .. يالله ما عليه باجر اتصل .. حطة الموبايل على الشاحن ونامت ..

قعدت الصبح ولا صديقها المغربي (( ما سميتيه شموسه )):D واسمه الشاب خالد ..:D:D يتصل عليها ويقول لها انا بانتظارك تحت ... وييييييييه شلون جذي راحت علي نومه ولا قعدت ما حطيت مكياج ..:D خالد لو سمحت عطني فرصه ربع ساعه اجهز نفسي .. تامرين امر عبير خذي راحتج ..وييههههه بعد حتى اهلي ما يمديني اتصل عليهم ..يالله لما ارد من السوق .. (( وظلت عبير تاجل اتصالاتها )) ..

جهزت عبير نفسها بسرعه ونزلت .. يالله انا جاهزه وين بتوديني ..
الشاب خالد : بوديكي كل المجمعات اللي باسبانيا مو معاك فلوس ؟؟!!..
عبير : اي معاي ليش تسال ..
الشاب خالد : هاا لا لا ولا شي بس اسال ...

خافت عبير وراودها بعض الشك ليشش ؟؟؟ يالله كملو ..:D

[ملجلج ●]

هلا بفطامي و شموسة تكملتتكم حلوة :D :D

يلااااااا دوري عشان أكمل :D

[قامت عبير وراحت مع خالد الى المجمعات و الأسواق // و قام الشاب خالد يفرجها على احسن المنتجات الأسبانية و يفرجها على روعة العمارة الاسبانية ....
المهم في خلال هذه الجولة قامت عبير و اشترت كم من فستان و كم من جزمة وكم من غرض...طبعا على حساب أبوها المسكين ...
و بعد ما أمضو نصف النهار في التسوق في المجمعات // عزم عليها الشاب خالد بكأس عصير بعد هالتعب // جلست على كرسي في حديقة تتفرج على العصافير و أشكالها الحلوة و راح الشاب خالد يجيب العصير .....
و فعلا جاء الشاب خالد ومعه العصير // شربوا العصير وهم يتفرجون على الطيور // و بعدين و فجأة أحست عبير بصداع عنيف في راسها و بنعاس شديد ,, بعدين ما أحست نفسها الا و هي طايحة على الكرسي و في نوم عميق ....
و في نصف الليل استيقظت على صراخ حارس الحديقة // يحاول يوقضها عشان يسكر الحديقة ..
وش صار في عبير وين أغراضها وين محفضتها



يلااااااااااااا عاد كملواااااااااااااااااا:D

[الشمس ●]

مررراااااحب ..

يمه منك يافطامي .. .. صدق تخوفين ..
بديت أتخيل عيونه الماكرتين , وكيف كانت تبرق في دجى الليل بكل الخبث ..
ليه حسيت إنك ناوية توهقين عبير الضعيفة بقووووة هذي المرة .. ؟!!

بس تعجبييييييني .. :D

وإنت ياملجلج بديت تتعلم .. مع إنك قاهرني ..
تدري أنا كملت القصة ويوم جيت أرسل الرد إلا وأشوف ردك .. صدق تحطمت

يالله يوم لك ويوم عليك .. يالله نكمل ..
______________________
قامت بسرعة وراحت للأوتيل .. شي وحيد باقي لها ويعطيها أمل في الحياة .. بطاقة الصراف تبع أبوها معاها في الغرفة , ولا الفيزا راحت خلاص ..
ولأول مرة تفكر عبير صح , وتدق على خدمة العملاء عشان تلغي بطاقة الفيزا مع إن المتخلف الشاب خالد مامعه لا رقم سري ولا شي .. , كمان
عبير نوت على شر من جد هالمرة .. وتبي تفك حقها من المجرم ..
تذكرت وين التقت فيه أول مرة .. قدام مطعم وجبات سريعة .. راحت لنفس المكان وصارت تدور حوله .. قررت تدخل , وجلست على الطاولة تتأمل في العاملين في المطعم وتشوف من بعيد المجرم بزات نفسه يتنقل بين المطبخ والكاونتر يوصل وجبات للجرسونات ..
ووتتأبط الشر حبيبتنا عبير وتقرر إنها تنتظره يخلص دوامه ..
حتى جا الليل وطلع المجرم الشاب خالد من المطعم تعبااااااااان وتقابله عبير وتبدا تكيل له من الاتهمات ..
إنت مجرم إنت حقير إنت جبار وأناني إنت مؤلم إنت جاني ( عشت جو .. لا تشرهون )
الشاب خالد : نعم .. أي خدمة ؟!!
عبير : أبي شيئين .. الأول الموبايل الله لا يهينك عشان أحتاجه وأنا في الغربة ..
والثاني .. ليه سويت فيني كذا ؟! ليييييه ؟؟
وأنا اللي كنت أشوف إنك أمين وطيب ..
الشاب خالد : هذا أنتم يالخليجين , طيبتكم مشكلتكم .. اسمعي يابنت الناس .. روحي عن وجهي لأجيب أجلك الحين ..
عبير : شوف إحنا طيبين بس مع الطيب , واللي يخون نجيب أجله .. أبي موبايلي والباقي بله وشرب مويته .. ولا أقول لك المحفظة مكلفتني كثير والله وتوني شاريتها :p
الشاب خالد : تصدقين آنية عبير إنك أحلى لما تعصبين .. عيونك تسحرني ..
عبير : هذاك أول ياشاطر .. العب غيرها , خسرت كل شي أدري ومع هذا خسرتني :p


______________________
عشت جو مع القصة والله .. وووو شغلتي تطيحونها في مشكلة أطلعها , تطلعونها أطيحها :p

كملوا .. وآسفة على الإطالة ..

الشمس .. ( أحسن وحدة تكتب قصص أفلام آكشن ورومانتيك اوووو تخرجها وتنتجها بعد :D )

[خالد ●]

مرحبا

الله يعطيكم العافيه


ودي اكمل بس صبر:D

[ملجلج ●]

شكرا أستاذتي الشمس......
يعني بعد هالتعب بديت أتعلم ....
شهادة افتخر فيها من أحسن وحدة تكتب قصص أفلام آكشن ورومانتيك اوووو تخرجها وتنتجها بعد ...

يلاااااااا أخوي خالد ننتظر ردك ........
على فكرة أخوي خالد بديت أشك فيك ... انت وش جنسيتك .... امزح معك:D

[الشمس ●]

سلام مرة ثانية

ملجلج أخوي .. لا أستاذتك ولا شي , وبعدين مو قصدي أقلل من كتابتك .. بس مو انت طيب كثيييير وتحب النهايات السعيدة ..
أنا قلت إنك بديت تتعلم الشر :o
عشان كذا لا تقول إني أستاذتك الله يخليك .. :p

يالله كل تكملة وانت بخير