/
اختـار سمحـات الـدروب النظيفـه
اللي غسلها رايـح المـزن برشـاش
يمشونهـا قـوم النفـوس الشريـفـه
اللي ضمايرهـم نقيـة كمـا الشـاش
ابيوتهـم مثـل الحصـون المنيـفـه
ما هي لطير البوم غيران واعشـاش
واحلالهـم للضيـف دايـم مريـفـه
لو رجلهم يسرح ويضوي على مـاش
والرجـل منهـم مـا يخلـي رديفـه
إن ما ت مثله مات وان عاش له عاش
وان مات منهم رجـل عقـب خليفـه
يطعن نحور القـوم ويـرد الادبـاش
يعرف هدف روحه ويعـرف وليفـه
ما يعرف الخونـة ولا هـو بغشـاش
وليـا رزقـه الله بعـذراء عفيـفـه
ايحطها مـا بيـن نونـه والارمـاش
ماهو على الخفـرات يستـل سيفـه
وان طالعوا فيـه الرياجيـل ينحـاش
حلـو النبـا سمـح المحيـا لضيفـه
ويصير له خـادم مسخـر وفـراش
وان مـد مـا مـدت يمينـه قصيفـه
مدت يمينـه تبهـر الخبـل والـلاش
واليا هـرج تلقـى علومـه طريفـه
ما هـو لهفـوات المناعيـر منقـاش
وان شبت النيـران مـا هـو بليفـه
في ساعة الكربـة سـواي ورشـاش
سده بعيد ولا أحـد يعـرف غريفـه
ولا هو لعرض المكرم العرض نهاش
والشوك في جنبـه سـوات القطيفـه
إن كان ما له بيت مامـون وافـراش
ما يرتكي فـوق الخبـول الضعيفـه
اللـي ليـا حركتهـا قدرهـا طـاش
وان جـا نهـار كـل قـرم يعيـفـه
ما هو ليا ثارت على القـوم رمـاش
الكذب يعرف بيـن الأجـواد زيفـه
والصدق مثل السيف صاطي وحشاش
وصحيفتة يـا طيبهـا مـن صحيفـه
ولهـا مـن العقـال كاتـب ونقـاش
حـاز المراجـل والمراجـل كليفـه
الا على اللي كل مـا رامهـا هـاش
وان شاف له من جانب القـوم خيفـه
تلقـاه للخيفـة مهـاجـم وبـطـاش
الصدق والمعـروف والطيـب كيفـه
ويغبش لها مع طلعة الفجـر مغبـاش
للحمل مـا تلقـى جنوبـه صخيفـه
حوله بروق تعمـي العيـن وافـلاش
يصبر على جرحـه ويمسـح نزيفـه
طبه بشبه خير مـن طـب الاحبـاش
ولا هو كمـا سبـع سنونـه ضعيفـه
دايـم يلحسهـا وللعظـم عــراش
وان شاف له في غيبة النـاس شيفـه
ما هو بخبل لاخضر العـود قـراش
دنيـاه لـن صـارت ذلـول عسيفـه
طوع علهـيا كـل عاصـي ونفـاش
وان كان قفـت مـا عليهـا حسيفـه
ولا هو ورا هوج المعاصير قشـاش
وان جاع ما وقع كمـا طيـر جيفـه
وان عري ما يلبس سماليل وأخيـاش
والله ماادري لمن لكن صح لسانه وابدانكم وصباحكم خير
/
قصيدة جميله وجزيلة ورائعة وكلماتها معبره ومن الـوزن الثقيل وكل بيت عن قصيدة