أبي أطفي لهيب البعد
أبي أنعش عروق القلب ليامن جيت وشفتك
أبي نور اللقا يصبح لعتمة بعدنا قاهر
تخيل روعة الدنيا إذا جا يوم ولاقيتك
أحاسيسي لك انساقت وصرت لخافقي آسر
بدونك عمري مايسوى وبغلا النفس ساويتك
شغلت الفكر بك وحدك وفوق النفس عليتك
هجر عيني لذيذ النوم وجفني لك غدا ساهر
قسمت القلب أنا نصفين ووسط الشق خبيتك
أمير في مملكة قلبي وعلى نبضاته وليتك
وداخل دمه وعروقه مكانك بينهم غاير
إذا ما أنت مصدقني نزعت القلب ووريتك
وإذا أصبح لغلاك خافقي ناكر
تجي كل الجوارح لك تقول اقبل هنا بيتك
أنا كنت أحسب الحب بس يجي عابر
لين القلب خفق باسمك ونبض القلب سميتك
يانبض القلب ..
بكرر شئ لك قلته وبه رددت حاكيتك
إذا تعزني وتغليني وبقلبك لي أنا خاطر
على نفسك أبيك تحرص مثل ماقلت ووصيتك
( ترى مثلك بهالدنيا وربي في البشر نادر )
وماتمنيت شئ فيها مثل ما أنا تمنيتك
ذبحني الشوق متى بلقى لهذا الشوق معك آخر
ياليت الشوق بي يهدأ وكل ما اشتقت لك جيتك