يا حمامه طاح غصنك وفارقك الامان = ابتدا خوفك وفارقني الغصن الندى
التوت بك مر الايام و التوديع حان = ترقبين الغصن ويخونك الحظ الردي
الحزن موّال جرحه على صوتك يبان = و التعب و الهم والخوف حادينك حدي
كل ما اوحيتك تونين بالصوت الليّان = انتي تجرين ونّه .. وانا معك ابتدي
من مغيب الشمس لين ارتفع صوت الاذان = غربةٍ تطوي ضلوعي وليلٍ يحتدي
اتنزح عن مكاني و اجي نفس المكان = كني اللي ضاعت خطاه ويخاف يغدي
افترقنا و المقادير مامنها ضمان = حالة الدنيا وقصـّـر عن الدرب اجهدي
ان نسيته له بقلبي شواهيد و كيان = و ان سريته حلم ليل وخيالٍ سرمدي
آه لو يدري وش اللي عقب فرقاه كان = ماتوصـّـى دمع عيني وصحى مرقدي
آه لو يدري وش اللي عقب فرقاه كان = ماتوصـّـى دمع عيني وصحى مرقدي
ولو يحس بلوعة الظلم يمكن ما استهان = واتقى دمعة وداعي وشرهة موعدي
ولو يحس بلوعة الظلم يمكن ما استهان = واتقى دمعة وداعي وشرهة موعدي
ولو ذكر ماكل قلبٍ يبي يرضى الهوان = قدّر انه مايساوم على العز اجودي
يالله المعبود يا عالم في كل شان = بامرك يضل البنادم وبامرك يهتدي
لاتخليني لزلة هوى نفسي رهان = و اغفر لروحي خطاها وسامح مقصدي
انتهينا والتفاريق من طبع الزمان = كل عينٍ ترقب ( سهيل ) من عقب ( الجدي )
وان بكيت وصار للدمع في عيني بيان = الغلا شيٍ من الله ولا هو في يدي
وان بكيت وصار للدمع في عيني بيان = الغلا شيٍ من الله ولا هو في يدي