حبيبتي .......امريكااااااااا

هذا الموضووع استقبلته من احد الزملالاء عسى يعجبكم يا رب



سامي ابن مدير عام ووحيد والديه مع أربع بنات، و.منصور. ابن تاجر أقمشة ووحيد والديه.
انهوا الثانوية طبيعة وبتقدير 77 لسامي و78 ل.منصور. .
وفي رياضتهم اليومية بعد كل مغربية والوالدين يمشون في طريق النهضة .
قال أبو سامي مافيه إلا أمريكا يابو.منصور. للعيال تقديرهم دمار.
الظاهر لازم نراسل الجامعات علشان نجيب قبول لهم ثمن نروح معهم.
أبو سامي: بس دوبني مأخذ إجازة ما ظن الوزير يعطينياه البركة فيك يا لدليله.
أمري الله بس ودي بخوتك .
أبو سامي :باحاول بس أول القبولات في أمريكا.

-
بعد أيام وصلت القبولات لهم وبدؤ في ترتيبات السفر.
جلس سامي و.منصور. على كبوت الفياقرا.
سامي : بأخذ المرسيدس الفياقرا معي ، باجنن البنات فيها.
.منصور.: بأخذ القرش BMW معي بانافسك يامملوح.
سامي: ظنك ياوافقون أهلنا؟
.منصور.: ما يردون لنا طلب والوالدة في مصبعي

عرضوا امر السيارات ...وكادت الموافقه ان تاتي
ولكن ... ام سامي قالت: اخاف الامريكيين لاشافوا وليدي .كاشخ بالسياره .يقتلونه علي شان يسرقونه ....وعندما سمعت ... ام منصور سيره القتل ... ارتفع عليها الضغط وبغت .... تخربط مشروع الدراسه برا ....كله علي بعضه ويالله عرفوا يهدون اعصابها ...وجأ الاتفاق علي ان تبقي السيارات في الرياض ..... ويشترون شي عادي برا




أقلعت الطائرة من الرياض وبعد ساعة جلس سامي و.منصور. في مقعدين بعيد عن أبو سمير الجالس في الدرجة الأولى.
.منصور. :اعقل لين يروح الوالد وبعدين سوى اللي تبي.
سامي :بس البنات بيطيرون فينا وبننحرج مع أبوك.
.منصور.: بس لغتنا مد ردعه وشلون بتفاهم معهم؟
سامي: مافيه لغة إلا بقيرل فرند ودجه وتجيك اللغة.
.منصور.:بس أيشلون تختار فيهم شقراء ولا بيضاء ولا سمراء ترا بيسوون زحمة علينا.
رجعوا إلى مقاعدهم .
أبو.منصور.: ان شاء الله تبيضون وجيهنا يا عيال ...مانبي . تسوون مثل سواتكم بالثانوي ... نبي تقديرات عاليه
طالعوا في بعض وضحكواا



وفي صالة المطار.

سامي: شف .منصور.أم بلوز ازرق تطالع فيني وشف الثانية اللي معها بعد تطالع.
.منصور.: ياشين عيونهم فيني ما هو فيك.
سامي: بدينا الغيرة اجل خلنا نثقل عليهم .
.منصور.: ليت عندنا رقم نذبه عليهم.
سامي: وش ذب أرقام في الفيصلية أنت ياغشيم ذولا كلام وعلى طول خشه عرض.
بعد تجاوز الجوازات والخروج للصالة الخارجية.
.منصور.: شف يا لحبيب البنات استقبلوهم شباب مالت عليك يطالعون فيك.
سامي : ما عليك شف تطالع فيني أروح أكلمها.
.منصور.: أبوي انتبه لا تفضحنا.
وصلوا إلى فندق دبل تري وناموا من تعب السفر.
بعد العصرية كانوا في المول المحاذي للفندق .
سامي: بين هالسوق هوس.
.منصور.: ذا اسمه تايسون كور نر مول يا عيني لوحاته هلالية.
سامي: خل النصر والهلال بعدين ، بس صدق بشجع الهلال وأنا نصراوي علشان الجنز البحري.
.منصور.: خلك ثقل لا تسوي زي المطار شف إذا جلسوا جلسنا حولهم.
سامي :يربيه شف هالقروي يذب أرقام
.منصور.: عربي وهي عربيه.
مر من عندهم وقال سلام شباب.
سامي: سعودي يالاخو .
نعم فيصل يا لحبيب الأخوان سعوديين .
.منصور.: وين أنت فيه تذب أرقام بأمريكا .
فيصل: توك جديد الظاهر ، ما تدري الذب حتى في لندن في الهايدبارك وفي الوايت ليز يا حبيب.
عزمهم فيصل على أيسكر يم وجلسوا .
سامي: شكلك محترف غزل.
فيصل :الغزل صدق في الفيصليه ما هو هنا رافعين خشومهم ياشين الغرور.
سامي: قديم في أمريكا أنت؟
فيصل: أربع سنوات خدمه وعلى وشك التقاعد باقي سنه واخلص بكالوريوس وراجع.
سامي: وين ساكن؟
فيصل : في قريت فولس وانتم ؟
.منصور.: دوب جينا بنسجل في معهد اللغة بجامعة جورج ميسون وبناخذ سكن جنبها .
فيصل: حلو جورج ميسون ادرس فيها والسكن قريب شكلنا نقلبها بنبي.
في الجامعة التقى فيصل بسامي.
فيصل :وين صاحبك؟
سامي :مع أبوه بيجي بعد شوي أنا قلت أكحل قبل.
فيصل :يا مالك من التكحيل والتشكيل.
سامي : وشو تشكيله؟
فيصل :هالحين تحسبك بدوخ كم وحده من أول نظره ولا تحسب الغمز يصيد أحد؟
سامي : أجل وش ظنك بس في أفلامهم سلهم عيونك وابتسم تجيك مروحه الصيده.
فيصل :اجل مذاكر أفلام ؟
سامي: أجل وشلون أعرف الديره وزود على كذا شباب يصيفون فيها يفكون علينا ويجيبون صور تشق الخشم.
فيصل :يا لحبيب الصور سهله أي بنت ممكن تصور معك وتعدك مخفه سايح وبس ، وأما الفك عليكم فالظاهر أرانب ربعك سمينه.
سامي : لا بس أنت شكلك مد ورجي ما أنت صقر.
فيصل :أي صقر وأي غراب لايهمونك ترا من كثر خبرتي لو أمتحن في العلاقات مع البنات عطونا ماجستير من سنه.
سامي : تراك تحطمني كذا أجل وشلون؟
فيصل :شف في الجامعة عامل البنات زي ما تعامل العيال بلا رومانسية وبعدين إذا عرفوك وصاروا يمونون بتسلم عليهم.
سامي : أسلم ؟ السلام سهل.
فيصل :يالادغف (كخخخ) أسمح لي صرت أمون .
سامي : خذ راحتك يا مستشار .
فيصل :يسلمون يعني تسلم خد بخد.
سامي : حلو اجل وصلنا.
فيصل :وصلت وين ؟مافيه لقط شفه يلقطون خشك ، شف كلش عندهم يهون إلا الشفة وورقة التوت.
سامي :صدق أنك خبيث ما أنت بخبير وبس دخلنا على التوت والكرز، أقعد.
فيصل :دوبك عرفت وبديت تفهم توت وكرز أنتبه لا تطب .
سامي : والدنس بعد مشترك مافيه مشاكل.
فيصل :الظاهر متعود على كباريهات يا سامي، ممكن ترقصين معي يا قمر وتقول لك بخمسين الساعة، أف لوعة كبدي .
مرت من عندهم شقراء وطالع سامي : ياربي
أتنثر أصير براد أبو أربعه مع مخلوط.
فيصل : أبتسم لها يادلخ .
أبتسم سامي وردت الإبتسامة بمثلها.
سامي خلاص صادتني ذي ما صدتها ، ياقلب تكفى فيصل شف لي مجدي يعقوب أبي عملية قلب مفتوح .



فيصل : أثقل يامالك من الإبتسامات ، أثاريك حاف وجيه.
سامي : أرجو ك خلني تراي أستويت صابتني في الثمانيات.
فيصل : ياشين من أول تحويمه خريت .
سامي بالحقها ، شفها دخلت المكتبه ، وراها يافيصل.
فيصل وين ما ني خويك ، ترا تضايقها يجيك الأمن بعلباك ينتلك برا.
سامي : اجل ضف ، بــــــــــأي.
دخل سامي المكتبه وعين في الطاولات وعين على الناس وشافها جالسه على طاولة ومر من عندها ورفعت راسها وهز سامي راسه hi>
ابتسمت وقالت هاي.
جلس على طاولة ماهي بعيده عنها ويقلب في دليل المكتبه وبعد نصف ساعه اتجهت للخروج من المكتبه وقام سامي وراها وعند باب المكتبه وقفت حتى مر سامي من جنبها وأبتسم وخرج وتبعته حتى صارت بجنبه وقال الجو جميل.
سامي : نعم.
قالت : طالب جديد.
سامي :وشو؟
قالت : تتكلم أنكليزي ؟
سامي : شوي شوي.
ضحكت ومدت يدها وهي تقول : باربرا هاريس.
سامي من السعوديه ومد يده مصافحا، أرتبك سامي عند ما لامست يده يدها .
باربرا: أشوفك بكره باي.
وقف سامي مكانه بين مصدق ومكذب حتى جاه فيصل وهويضحك.
فيصل : يالخطير على طول علقتها.
سامي : خلني في حالي ماأدري وش صار بس الظاهر علقتني .
فيصل ياكنج أنت حب من أول نظره طنطنطن طنطنطن طنطنطن.
سامي : صفقني تراي في حلم ، معقول ذا اللي صار تصدق أنا تكهربت قل تخسبقت ما عرفت أهرج لعنبوا الانجليز طار وينك يادوينق سلمى .
فيصل : كخخخخخخخخخخخخخخخ ، ياربيه أنتا لقطه.
سامي: بروح للفندق الظاهر أثرت الشمس في دماغي.
تمدد سامي في سريره وعلق بصره في السقف و .منصور.
يناديه: سامي وشبك من رجعت من الجامعه؟
سامي ماتوحي أنت؟ الوووووووووووووه. الوووووووووووه يابشر حسوا فينا حسحسونا.
سامي: هاه وش تقول.
.منصور.
: وش أقول ؟ الله يرحم أميمتي هالحين جاحدني كل هالوقت.
سامي: ماجحدتك وش تقول انت؟
.منصور. :وش السالفه انت طايح على راسك .
سامي: يوه يوه ياأنا طبيت وأنا ماأدري.
.منصور. : فضفض .
سامي: امريكيه أسمها باربرا تعرفت عليها في الجامعه.
.منصور.: تعرفت عليها!!.
سامي: تقدر تقول تعرفت علي والا انا دربجه ضاع الانجليزي يوم جيت بكلمها.
.منصور.: طيب وش صار كلمتك وراحت وين القصه؟
سامي: القصه هنا بين ضلوعي قام يخفق تقل فرقة سامري.
.منصور.: واااااو ياروميو وااااو ياعسيو.
سامي: وش عيسيو؟
.منصور.: نسيته عيسى اللي ان مرت بنت من الثانوي من جنبه تنهت وقال حبتني.
سامي: خل الغلط انا ماقلت شي ،،،،،،تصبح على خير.
.منصور.: شكلي خربتها،،، تصبح على خير.
في اليوم التالي التقى بها في المكتبه واشارت له بالجلو س ، وتكلموا عنها وعنه طويلاً مع ضحكات على بعض الكلمات التي كان لايستطيع نطقها فتعدلها له.




وأستمرت اللقاءات في الجامعه حتى اعلنت الجامعه عن رحلة نهاية الاسبوع الى نيو يورك فعرضت عليه الصحبه في الرحله وسجلا سوياً.
بعد وصول الباص الى نيويورك قالت باربرا: سامي نروح مع المجموعه أو نقابلهم بكره هنا.
سامي نقابلهم بكره أحسن ،، هيا بنا .
سارا الى محطة المترو ومنها الى محطة مانهتن برودواي.
قضوا يومهم بين تايمز سكوير ومركز التجارة العالمي والامباير ستيت وتمثال الحريه وتوقفوا امام مبنى المتحدة.
باربرا: سامي حنا نمثل الامم المتحدة انت من الشرق وانا من الغرب.
سامي: بس انا أشبه كوفي عنان.
باربرا: هههههههه وانا مادلين والبرايت المندوبة الامريكية .
في اليوم التالي عادوا الى المجموعة وانطلق الباص الى فرجينيا وهما في مقعد واحد .
التقى سامي مع.منصور.
وقال : .منصور.خلاص بتزوجها.
.منصور. : صاحي أنت ماهي مسلمه.
سامي : عرضت عليها وبتسلم .
.منصور.: واهلك وموافقة وزارة الداخليه كيف بيجيبها.
سامي: انا في أولى جامعه واربع سنين يبدل الله من حال الى حال.
.منصور.: شكلك دورتها في مخك .
سامي: وتفاهمت معها على كل شيء.
.منصور.: ما أنصحك بالزواج من غير بلدك.
سامي: ياوطني أنت.
.منصور. : وش فيها الوطنيه ،،، فكر بكره ترا بيروح الجمال ويبقى العقل.
سامي : وش يروح الجمال ،، الجمال روحي ماهو حسي.
.منصور.: شف كم واحد تزوج من غير سعوديه وش تاليته ماتسمع قصص الناس .
سامي: المحب عمى .
.منصور.: العمى يعالج ،، غير الجامعه وأن بغيت وأنا اخوك نغير الولايه لاتورط نفسك.
سامي: مافيها ورطه كم واحد تزوج ولا عليه.
سمير: ياسامي الزواج اطفال ومسؤوليه ومستقبل،،، طيب سؤال.
سامي : قله.
سمير: لنفرض تزوجتم وبعد اربع سنين وانشاء الله عندكم اطفال،، بترجع السعوديه وهي معك ؟ولنقول بترخيص بعد.
سامي وش تبي توصل له.
.منصور.: ظنك تقعد معك على طول في السعوديه ؟ واطفالكم عرب ولا امريكان؟ وقديش بكلفك زوارتها كل سنه؟
سامي : وراك قفلتها ،، كلش في وقته حلو.
.منصور.: لاتهرب من نفسك الاسئله جاوب عليها لنفسك ماهو لي .
سامي: صدعت براسي.
مضى سامي في غايته وبعد اسلام باربرا في المركز الاسلامي في دي سي وتسميت نفسها ابرار تم الزواج وبحضور بعض اصدقائهم.
.منصور.: مبروك الزواج ولو أنه ماودي بس أهه.
سامي: الله يبارك فيك ،، خلني أفرح تكفى .
.منصور.: طيب آخر كلمه واللي يرحم والديك اسمعها.
سامي : وشي .
.منصور.: الاطفال أخرهم شوي حتى تعرف وضعك لاتستعجل.
سامي: وش دراك انا متفقين نأخرهم سنه.
.منصور. : شكلها أعقل منك كخخخخخخ.
سامي: كخخخخخخخ.



سامي: الحمد لله حامل ليش تبكين ياحياتي.
ابرار: حنا متفقين بعد سنه.
سامي : الله ومايريد ،،، اذا ولد سمير واذا بنت مي.
ابرار :اذا ولد يوسف واذا بنت ساره.
سامي: اذا بان نتفاهم.
ابرار: ذا حملي أنا أسميه.
سامي : وشلون وانا ابوه لا تحطينها مشكله يالله بعدين.



ولد يوسف وولدت ساره بعده بعام وصارت اعمارهم ست وخمس وجلسوا في الحديقه.
سامي: ابرار ودي ادخل يوسف وساره في الاكاديمية الاسلاميه السعوديه يتعلموا عربي ودين.
ابرار: توهم صغار خلهم في الببلك سكول اخف عليهم.
سامي: بس ماتلاحظين انك ماخذها الاطفال مني كلش.
ابرار: مافيه شي لا تحط مشكله ،، الاولاد في امريكا خلهم يعيشون حياة الامريكان.
سامي : بس انا باقي عليه سنه واخلص الماجستير وراجعين للسعوديه.
ابرار: ليه ترجع كمل الدكتوراة مادامك تدرس.
سامي: انا كلمت اخواتي وخبرتهم بزواجي واطفالي وطلبت مساعدتي في ترضية والدي.
ابرار: حتى لو صاروالديك بيرضون مالهم الا انت.
سامي: نرجع لموضوع المدرسة.
ابرار: بلاش الاكاديمية كل زملائك اللي زوجاتهم امريكيات اطفالهم في الببلك سكول وش معنى حنا.
سامي: الاكاديمية يتعلمون فيها العربي والدين لأن مستقبلهم في السعودية.
ابرار: ماهو شرط.يمكن تحصل عمل أنت هنا وش يخليك تضيع فرصه احسن.
سامي: الغربه صعبه ابرار ودي ارجع لأمي وأبوي وديرتي.
ابرار: وانا مافكرت فيني كيف باعيش في السعودية.
سامي: ماعندك مشكله انت مسلمه وش المشكله فيه.
ابرار: مافكرت في أهلي وصديقاتي وعملي.
سامي: انا أهلك والعمل مقدور عليه هناك.
ابرار: نفس الكلام ارده لك انا اهلك وبلاش تفكر في غيري واطفالنا.
في الجامعه التقى التقى .منصور.
سامي: آآآآه يا منصوربدت مواجعي وليتني سامع كلامك.
.منصور.: بدت الاختلافات،، أكيد عند الاطفال.
سامي: نعم ماتيبهم يتعلقون فيني ماتيبهم يتعلمون عربي ودين وشكلها حاسبه خط الرجعه.
.منصور.: كيف بالله؟.
سامي: حاسبه حساب يوم الانفصال وانا ياغافل لك الله.
.منصور.: اجل بديتوا الافتراق النفسي.
سامي: آآآآه يا .منصور. أطفالي يضيعون قدامي وانا أشوف ،، حتى انا ماعاد تبيني أرجع للسعوديه.
.منصور.: شف لاتقعد تأوه على اللبن المسكوب شف كيف النجاه.
سامي : دبرني ترا رأسي بينفجر من الافكار ماتوقعت أنه بيجي يوم أعجز أدبر زوجتي .
.منصور.: في ليلة السبت تعالوا تعشوا عندنا وبعدها اعلمك وعلى الاقل خلوا ام علي تذوقكم أكل سعودي ترا بطنك خاس من قلته.
سامي: ياهنيك يا .منصور. تزوجتك منك وفيك.
.منصور. : الحمد لله لو تزعل ولا تهج اهلها قريبين يعني عيالي حولي.
سامي: خلاص السبت نجيكم.
.منصور.: بديت نلخبط يالله دخيلك اقول ليلة السبت يعني يوم الجمعه في الليل .
سامي: ههههههههه.
جلست تهاني مع ابرار بعد العشاء في احاديث عن الاطفال ومدارسهم ومشاكلهم.
وبعد انصراف ابرار وسامي .
تهاني: شكوك سامي حقيقه يا .منصور.
.منصور.: كيف بالله عليكي.
تهاني : ابرار بدت تتغير فعلاً وشكلها حاسبه حساب رجعة سامي للسعوديه وانها تحاول معه يجلس معها في امريكا على طول .
.منصور.: ياشيخه ذي وساوس لأ يسمعها سامي ويزيد جنانه.
تهاني : صاحبك ومن الأمانه تقول له علشان يرتب نفسه من بدري .
.منصور.: الامور طيبه بلاش نعكننها بينهم.
التقوا في الجامعه وقد مضى اشهر وابرار بدئت تتغير حتى لامها سامي لتركها الحجاب بعد سنوات .



سامي: مرحبا ابو علي كيف الدراسة معك.
.منصور.: هانت كلها ترم وخلاص ونفتك.
سامي: ماشاء الله عليك امورك حلاوه.
.منصور.: الحمد للكريم المنان،، كيف أمور أولادك.
سامي: شفت بداية الانتكاسه حتى الحجاب رمته وشكلها بتعلنها حرب.
.منصور.: وش بتعمل ؟
سامي: شكلي أخلص من الماجستير والقط اولادي ويافكيك على السعوديه .
.منصور.: من صدقك تقوله؟
سامي : اجل أخلي أولادي يضيعون وأناأشوف!!.
.منصور. : وأمهم ياسامي.
سامي : من باعنا بعناه لوكان غالي .
.منصور.: بس الأمريكان شياطين ويجيبوا اولادهم عن طريق سفاراتهم ولو بالقوه .
سامي: قوة مين ياعم ،، اذا ما أخفيتهم سنه على الاقل يمكن يجيبونهم.
.منصور.: شكلك راسم الخطه ومخلص.
سامي: الايام هذي قدمت على قبول لدرجة الدكتوراه علشان اطمنها اني بأقيم على طول،، وباحسن العلاقات معها لدرجة التسليم لها.
.منصور.: وبعدين .
سامي : باصير اطلع مع الاولاد باليوم واليومين في فترة انشغالها بالجامعه لولايات قريبه علشان ما تستغرب فركتنا.
.منصور.: لحد كذا حلو.
سامي : انا طلعت تصريح مرور لسفرة للسعودية لأولادي من السفارة وبيوصلني خلال ايام وطالب يرسلوه على عنوانك فانتبه لا أحد يدري عنه.
.منصور.: ليه تصريح المرور ماهم سعوديين.
سامي: ماهي تبغى جناسيهم امريكيه بس وحاطه الجوزات في صندوق امانات في البنك.
.منصور.: وشو دوري في المسلسل.
سامي: ما أبغي يطولك شي ولا حتى بيوم السفر ما راح أقول لاأحد.
.منصور.: ولايهمك ياعم وين حاسبني.
سامي: عارفك يابو علي بس وعارف البلد هاذي ومشاكلها ولا أبغي يطولك بسببي شيء.
أستكمل سامي مخططه وبدئت المشاحنات تهدأ بينهم ويطلع بالاولاد ليوم ويومين بزيارة لزملائه في الولايات القريبه .
حصل سامي على الماجستير واخبر زوجته انه وده يسافر لكاليفورنيا بعد تعب الامتحانات


وطلب ان تسافر معه والاولاد فاعتذرت بانشغالها في عملها في الجامعه وسافر بالاولاد بعد ان أخذ جوزات المرور من سمير ووصل الى نيويورك وحادثها بالهاتف وتكلمت مع الاطفال ثم ذهب الى مكتب الخطوط السعوديه لشراء التذاكر واخبر الموظف ان ابنائه جواز سفرهم سعودي وانهم مواليد أمريكا فهل ممكن ان يسافروا بدون بطاقة خروج I94 واخبره الموظف انه لم يسبق مثل حالته ولاشي في ذلك.
في اليوم التالي كان في مطار جون ف كيندي مع اطفاله وعلى كاونتر السفر للخطوط السعوديه قدم تذاكر السفر للموظف وأخذها الموظف وغاب بها داخل المكتب قليلاً ثم عاد اليه .
الموظف : اولادك ماعنده كرة الدخول ولاجوازات امريكيه.
سامي: اولادي جوازاتهم سعودية واذا رغبت رجعتهم لأمريكا لازم احصل على تأشيرة دخول من السفارة الامريكية لهم.
الموظف: فيه نموذج ممكن توقع عليه ان سفرهم على مسؤليتك.
سامي: نعم اوقع وهذا معي قبول للدكتوراه وI20 اللي يؤهل دخولي لأمريكا لسنتين للدراسة.
أخذ كروت صعود الطائرة وأجرى المكالمة الهاتفية الأخيرة مع ابرار ضاحكها وتحدثت مع الاطفال ثم اخبرها انهم سياتون بعد غد وانهت المكالمة مودعة لهم.
اقلعت الطائرة وجلس بين طفليه ووضع يديه خلفهم ورفع بصره الى السماء ( الله أكبر الله أكبر سبحان الذي سخرلنا هذا وماكنا له مقرنين وأنا الىربنا لمنقلبون اللهم أنا نسألك في سفرنا هذا البروالتقوى ومن العمل مارتضى اللهم أنك انت الصاحب في السفر والخليفة في الأهل اللهم هونا علينا سفرنا هذا وأطوي عنا بعده ) والتفت واذا طفليه قد مالت اعنافهم عليه وذهبا في اغفائة


thx:p

اخوي ضناني الشوق
يعطيك العافيه اخوي
قصة حلوه00لكن مين اللي يعتبر من هالشي

تسلم اخوي

شـــــــوق

عزيزي ضناني الشوق



اسمح لي نسخت القصه عندي بقراها و ارد عليك لانها طويله


المهم تسلم يدينك يالغالي

ماشاء الله اسلوب سردي خطييييييييييييييييييير وقصه فيها درس مهم مهم مهم جداً......





يعطيك الف عافيه أخوي ضناني الشوق

السلام عليكم ... صباحكم وردي جداً

أخوي ضناني الشوق ... أشكرك على هذه القصة الجميلة جدا

القصة جميلة جداً ... و تحكي عن معاناة الشباب السعودي أو الخليجي بصفة عامة في البدان الغربية

موضوع القصة سرد علينا القصة و بداية المشكلة ... أو بداية النهاية

يا ريت لو تخبر صديقك أن يطلعنا على نهاية نهاية المشكلة ...

الأسلوب السردي واضح و بليغ و يلح على المتابعة ... و الترابط ممتع ... و أسلوب التخاطب بين الشخصيات ممتاز ...

و لكن يشوبها عدم وجود قفل لعلاقة بعض الأشخاص بالقصة . مثل :

- آباء سامي و منصور ماذا حدث لهما بعد وصولهما مع أبنائهما لأمريكا.

- صديقهم فيصل و مدى علاقتهم به.

و لكن القصة جميلة و موضوعها يخفىتلك الاخطاء ال غير ملحوظة

أتمنى أن أسمع تكملتها و ما حدث للأولاد في السعودية بعد ذلك لأن هذا هو الشق الأهم في القصة.

و لك مني أجمل الأمنيات

أخوك / فـــهـــد

[معدل بواسطة فـــهـــد بتاريخ 07-05-2001 عند 03:09 AM]