منتديات الوئام - عرض مشاركة واحدة

10 / 02 / 2012, 10 : 03 AM

/

لوخسرتـك ماخسـرت العمـر.. والدنيـا متـاع
وأدري أني لو خسرتـك ماخسـرت.. إلا قليـل

بس فكر زين تعرف مـن خسـر فينـا وضـاع
وتعرف إنك لو تلـف الأرض .. وتـدور بديـل

والله إن تبطـي ولـو لفـيـت في كــل البـقـاع
ولو تسوي وش تسوي ماأنت لاقـي لـي مثيـل!

وين تلقى مثل شخصي شخص..وطباعـي طبـاع
ووين تلقي مثل قلبي قلـب .. أو مثلـي خليـل.؟

البشر واجد .. نعـم .. لكـن فـرق الانطبـاع.!
يجعلـك يمـي تميـل .. ويـم غيـري ماتميـل

يارفيقـي .. انتبـه .. واحسـن إلـي الاستمـاع
للمواقف دور في كشف المزيـف .. والأصيـل .

وأنت ماقصـرت فينـي موقفـك جـداً شجـاع
طعنتـك فـي الظهـر كانـت اكبر إثبـات ودلـيـل

بيض الله وجهـك اللـي ساتـره تحـت القنـاع
ورايتك بيضا معـاي وياعسـى عمـرك طويـل

يعني أعطيك الثقة وتردهـا ب"لـوي" الـذراع !
ياخي ماشاء الله عليك أبدعـت فـي رد الجميـل

مــــدري كــيـــف أشــكـــرك ؟!
مــدري كـيـف أرد الـصـاع صـــاع ؟!
كنت أحسب أنك عزيز النفس .. تطلع لـي ذليـل

كم وأنا عييـت أصـدق فيـك قـدر المستطـاع
من غبائي كنت أسكت وأعذرك .. وأثر الحصيل !

جـرح قلـبٍ ميزتـه فـي كـل يـوم الاتسـاع
ودمع عين" ينهمر مـن ضيقتـي فـي كـل ليـل

والله إني كنت أحبك حب .. وأتبعـك إتبـاع
كنت لجل أرضي غرورك بس ...أسوي المستحيل

كنت أعمـى فيـك .. لا.. لا .. فيك ميـت للنخـاع
كنت مدري كيف ؟ لكن كنت صادق معـك حيـل

كنت أمارس في غرامي لـك سياسـة الانصيـاع
وكنت لاغـي معـك فكـرة أعتـزل او أستقيـل

اندفعـت بكـل مافينـي .. وســوء الانـدفـاع
يجبـر الإنسـان أحيانـاً.. يفـكـر بالرحـيـل

صدمتي فيـك إنـت .. خلتنـي أفكـر باقتنـاع
إن قتـل النفـس راحـة لـو أنـا كنـت القتيـل

انفجر راسـي مـن التفكيـر.. وازداد الصـداع
كيف أنا بفتك من جروحك ودوشـة "قـال قيـل "

صرت سيرة في حلوق الناس.. وتالي هالضيـاع
" انتحـر ؟ معقـول ! يـاالله وش هـذا الغليـل

رحمتك يارب لامـن ضاقـت امنحنـي وسـاع
أنت حسبي في الزمـان الجايـر ونعـم الوكيـل

لا غدى "مستقبلي والماضـي" أطـراف النـزاع
وصفحة الماضي سواد وشئ مـن هـذا القبيـل

فلازم انسى لجل أنهي بداخلـي هـذا الصـراع
ولازم أتقوى .. عشـان أحقـق النصـر الجليـل

وطالمـا إن الهجـوم أفضـل وسيلـة للـدفـاع
مستحيل أرضخ لـو أن الحمـل ياربعـي ثقيـل

والبخيل اللي نساني واشتـري فينـي... وبـاااع
يذلـف .. الله لا يـرده .. والله بجرحـي كفيـل

وإن سأل عنـي وجاكـم بعـد فتـرة انقطـاع !
علمـوه أنـي نسيتـه بـس أنـا مانـي بخـيـل

طالما كان السبب فـي قوتـي .. قبـل الـوداع
بلغـوه أقـل شـئ بخالـص الشكـر الجـزيـل

/