بسم الله .. خل نبدا من قبل الأذان .. طبعا بحوالي ساعه البيت يكون من كثر الهدوووء هادي >> خربتي بيت التعبير يا شيخه هههههه الموهم ..
وتبدأ الأفواج المفوجه تدخل من عتبت الباب ..

أخوي وحرمته وعياله الأربعه الينانوه .. أختي وزوجها وعيالهم الثلاثه .. واحنا اللي فالبيت .. لكن أيام الخميس والجمعه والسبت تزيد أختي الثانيه وزوجها وعيالها الأربعه ..

يعني تف تف تف تف عليهم .. يستوي البيت حضانه .. الموهم ..

ونبقى في موال الزعيج والصريخ والعصبيه والهداوه والضحك لحد قبل الأذان بعشر دقايق .. اييبون الرطب >> بس طبعا عشان انا ما احب آكل رطب (( على قولت أخوي بنت ككاو ههههه )) هاذي جمله كل يوم أسمعها .. فاييبون وياه تمر .. وماي ولبن ..

المهم يفطرون الرياييل ويسيرون المسيد .. وأحنا نسير نصلي .. طبعا نيلس نترياهم لين ايوون .. والسماط والأكل يكون جاهز ..
طبعا عنا عاده .. أنه لازم الأكل اللي يسوونه فبيتنا أغلب الأهل ياكلون منه يعني العمات والأعمام والخالات و اليران ويران اليران واللي حولهم >>> قولي الفريج كله ههههه .. الموهم ..
وهم يردونها بالمثل .. يعني هم بعد يطرشون.. فيكون على السماط أكثر من 6 إلى 7 أنواع من العيش أو الطبخات الشعبيه ..

ومنها .. 1. فريد أو اللي يسمونه ثريد ..
2. هريس
3.مجبوس دياي >> وهذا المفضل بس من إيد عمتي ههههه .. أو لحم أو سمج لكن السمج يكون آخر الأشياء اللي نفكر ناكلها .. لأن أمي اصلا ما تسوي برمضان سمج .. والأخت اللي تكتب لكم ما تاكل سمج إلا إذا كان ستيك بدون عضم ..
4.تحته دياي .. ما اعرف انتو شو تسمونه بس الكويتيين يسمونه مطبق .. أو لحم ..
5.معكرونه
6. فطاير جبن + زعتر + لحم + دياي .. او تكون بالبف باستري دجاج او لحم اوجبن .. >>>وفي فطاير عاد يبالها شرح هههههه.
7. صالونه دياي او لحم ..>>> انتو تسمونها مرق ..
8.عيش أبيض ودياي مقلى وحمصه .. هههه ما اعرف كيف أشرحه لأنه يطول الشرح ..<<< اللي يسمع يقول بقولكم الطريقه هههههه ..
9 . دياي فالفرن .. أو لحم فالفرن ..
10. دياي بالروب ..
11.خبز محلى .. هذا النوع نحنا ناكله ويا الشكر .. أو بالجامي .. طبعا النطق مو بحرف الجيم .. ههههه مثل اشحالج ..خذو آخر حرف وانطقوها جامي .. يكون أبيض يسوونه من الحليب ..
12 . طبق الحلو الشعبي اللي لازم على كل سفره فرمضان .. ويكون على السفره الرئيسية .. اللي هو [ لقيمات ] .. ويحطون عليه دبس .. (( الدبس مثل العسل لكن أسود وطعمه أحلى من العسل يعنى حلاه بزياده )) .. ويقولون في عندنا مثل شعبي يقول .. [ دبس أحسن من زوليه ] هههههههههههههههههههههههههههههه لو تعرفون قصته هههههه بس بعدين بخبركم>> نذاله ..
13.سلطات .. يكون في نوعين من السلطه .. العاديه والفتوش.. و إذا بغو يغيرون يسوون تبوله .. ههههه او يمكن وحده منا تتصدق عليهم بسلطه يديده >> ما تقصد عمرها ابدن ..
14. روب بالخيار ..
15. أسياخ دياي ..
>>>> يالسه تعصر مخها .. ههههههه يالله كل يوم نيلس على السفره بس مب قادره اتذكر هههههههههه..
16 . بعض الأطباق الغريبه اللي كل يوم وحده اتطلعها هههههه ولازم غصبا على الكل يذوقون وخاصه الرياييل و إذا واحد منهم تجرأ وما ذاق هههههه عقابه ألييييييييم.. >> اسولف ترى ههههه..
ههههههه لالا فالغالب إذا شكله حلو او غريب يذوقون .. بس إذا اكلوه مره خلاص ما ياكلونه إلا بعد فتره عشان جي ما نتعب عمارنا هههههه .. و إذا عييب واحد منهم يسوي إعلانات حق الباقين هههه
17. أنواع العصاير .. لازم يكون في نوعين من العصاير .. يعني كل يوم شي .. مرات توت ، تفاح ، فمتو ، تانك برتقال ، كوكتيل فرش>> هذا اللي يشربه يجني على عمره ههه .. ، برتقال فرش، ليمون ، مانجو بس ما اضن في عصير ما يبت اسمه ههههههههههههه ..

وتعبت من كثر ما اعدد هالأكل وما يخلص .. طبعا نقعد حوالي 20 نفر على السفره .. وعاد اللي فالشرق يقول حق الي فالغرب شو جدامك يمكن يسير فخاطره .. ههههه وتستوي حوسه .. والكل يتكلم والكل يطلب من الثاني .. لحد ما ياخذ كل واحد صحنه وملعقته .. خلاص يصير صمت مطبق الكل ياكل .. إذا في طلب إضافي هههه ماي او عصير .. ههه طبعا يكون فاضح ولازم الكل يعلق عليه ههههههههههههه..
وطبعا الله لا يوريكم التعلقات .. وامسك يالضحك .. (( موقف من المواقف اللي تتكرر كل يوم .. إذا يلست عند واحد من اخواني و خاصه الكبير .. انا اغرفلي .. بس على أساس هو يسوي رجيم وما ياكل عيش ياكل استيك دياي بس حبه .. طبعا وانا آكل ..مرات حد يطلب شي يكون جدامي فلازم نا امد ايدي واناوله .. بس يوم ارد عيني فالصحن .. اشوف صار نص وإن كررتها يصير ربع .. ههههههههه الأخ اللي عندالي يسحب .. هههههههه إذا حطيتلي مره ثانيه .. يقولي بببببببببببببسج هالكثر تاكلين ..هههههههههههههه مو كنه ماكل صحني كله هههههههههههه..)) ههههه والله لا يوريكم كلهم يتساعدون علي ..

الموهم بعدها يغسلون و يتريون المدخن يتعودون ويتعطرون ويطلعون المسيد .. واحنا كل وحده يا اما تمسك قرآنها وتخلص لها كم جزء او نقعد نسولف او كل وحده تمسك لابتوبها .. لحد ما يرجعون من المسيد ..

بعدها نييب الجاي (( يعني الشاي )) الأحمر والأخضر .. والينسون .. بس مب دايما نسويه .. يعني إذاحد طلب ..

وطبعا منهم يطلعون ويغادرون المجموعه بعد الفطور او بعد ما يردون من المسيد .. فيتناقص عددنا .. الموهم .. لحد الساعه 12.. تنحط سفرة الحلا .. الحلا المبتكر والفاشل هههه المهم يعني انها تنحط على السفره (( تقريبا طبقين حلا + لقيمات + خبز محلى )) .. والقهوه شي اساسي.. و ساعات اييبون كنافه مب دايما .. وناكل كلن على قد ما يقدر.. بالعاده الحلو ما ينتكل إلا شوي .. يعني بالعاده اللي يخلص هو الفواكه .. و طبعا لازم دلع الرياييل ييلسون جنهم ضيوف .. ولا كل وحده منا تمسك سكين وتدلعلها واحد .. ههههه وانا الفقيره غالبا يطيح بجبدي اخوي صاحب المعارك الشرسه .. وبس بعدها الكل ياخذ عياله ويسير بيتهم من غير مطرود .. هههههه .. يبقى البيت هادي .. وبعدها بسويعات قليله تبدأ معركتي مع أخوي المصون .. ما اعرف ليش هههه بس لازم نكسر شي مع اننا مو قراب بالعمر .. يعني بيننا سنين .. الموهم .. على الساعه 1 الككككككككككككل خخخخخخخخخخخخخخخخخخخخخخخخاااااخش .. يعني في سبعطعشر نومه إلا انا الجنيه الوحيده الواعيه بينهم .. ههههه

ايلس لحد ما يأذن ..

قبل الأذان بنص ساعه او ساعه اسير اواعيهم واحد واحد واعطيهم ماي وإذا يبون تمر بس غالبا ما ياكلون .. المهم.. وهذا هو السحور ..

ههههههههههههههههههههههههههههههه بالله قولولي ابدن ما طولت صح ..

هاذي عاداتنا يا ذا الحجاج .. و أي شي ما فهمتوه أشرو وانا افسره لكم >> يقال انها تعرف لهجات هههه ..


كنت بحطلكم صور .. بس باجر اإن شاء الله بصور لكم هههه..

واعذروني على القصوور .. حووور ..