البارحه كني عن النوم ملزوم = والنوم اشوفه بس عيا يجيني
ناديت قلت اشفيك قال انت محروم = حالك حزينه وانت شكلك حزيني
اشوف في خدك علامات ووسوم = ترى دموع الحزن خلتك شيني
قلت المحبه صابت القلب بسهوم = ومن كثر تفكيري صنعت الونيني
ابحرت في مركب من الحزن مثلوم = وعلى محيطات الهوى سابحيني
وهبت على المركب معاصير وغيوم = وضاعت مجاديفي وتعبت ايديني
واصبحت مثل اللي يتيم ومضيوم = ما له عوين وحالته بالمهيني
والموج زاد وقلت يا موت معزوم = والموت قبل إني عزمته يبيني
قمت اتشهد كني اليوم معدوم = وش حالة المعدوم يا عارفيني
والمشكله ما ني بسباح واعوم = حوت البحر يبغى الغداء يحتريني
يا حوت جاك الرزق يا حوت مقسوم = تكفى طلبتك روح خلك عويني
ما بي عواذيلي يقولون مرحوم = اللي كلاه الحوت ذيك السنيني
يا حوت نبغي فزعتك جاك مكلوم = جرحه جديد وجاب جرحٍ دفيني
نبي تودينا على شاطي القوم = وإلا ترى ليلي معك ليلتيني
من بعد ذا ياعذلي كثر اللوم = انا وقعت بحب والحب فيني
حب المهاه اللي لها الزين مرسوم = فازت على الزينات عرب ورطيني
من حبها ما ذقت انا لذة النوم = والعمر راح وحبها يكتويني
ترسل مراسيل الهوى دايم الدوم = وانا بعد مرسل لها نون عيني
حبي لها يزداد يومٍ بعد يوم = والحب لا من زاد له جمرتيني
جمره بكبد اللي له البعد محتوم = وجمره خطيره تحرق الساكنيني
يا من يودي لي من البعد مختوم = حطيت فيه الشعر يا سامعيني
وصلاة ربي عد ما طاير يحوم = على الشفيع وصاحب القبلتيني