سلام تسليمة وفا ترقا على متن السحاب=للي علومه منزلتها شمت عن منزالها
لصاحب اللي وسط صدره شال لي كلمة عتاب=ليته قبل يشتالها قدام عيني قالها
تعمد إزعاجي بدون أسباب يامال الذهاب=وأنا أحسبٍ صدره وسيع ويحتمل لثقالها
ياصاحبي بالله وقف وين سريت الركاب=فقر لها ياصاحبي وأكرب عليها عقالها
ياصاحبي خلطتها سؤال وأردفته جواب=والواجب أنك تستمع موجز وبث أرسالها
الحمدلله يوم حنا بينا سهول وهضاب=وأنا جنوب الدار عنك وأنت بأقصى شمالها
الرجل دون أخلاق مثل السيف من دون الجراب=يبقى وحيد وعلته تتزايد بسلالها
الحب سلال البدن..والشوق..زواي الرقاب=وأنا بليت بها ومن فوق المتن مشتالها
ماني بفاضي للعلوم اللي كما ضوح السراب=نقالها فيه انفصام وحالته يرثالها
ياراسي اللي لسما شبحك وتحقيق الصعاب=كب الدوادي والدعاوي..وأنس..مالك مالها
اللي من أدنى الدون يزعل ويتعمد للغياب=خله ولابد الليالي تسحبه لهوالها
من لاحتسب لي ماأحتسب له..لا ولا أعمله حساب=مادام بطل بابها نقفل عليه أقفالها
لابد ماتوضح لي الرؤيه وينزاح الضباب=ويبين ما في البير من ماها..بنسفة جالها
ياصاحبي ترى بدايتنا ونهايتنا تراب=والنفس لك أمارةٍ بالسوء دعها بحالها
صداقة رجال الشرف..تبقى رصيد وفالحساب=تسوى قناطير الذهب بسويسرا وأموالها
وصداقة عيال المصالح..هم..وأفات..وعذاب=يبقى اثرها بسمعتك..وبغترتك..وعقالها
صاحبك بقعا شيبت به ومسحت راسه وشاب=من كثر ما شبعته دروس..وعرفته..بحالها
لوكان عمره في بداياته..وفي سن الشباب=ألا أنه أصبح من سواياها..بضمن أبطالها
من الخطا الفادح..تعلمت الفراسه والصواب=ياللي تقول أن العمر كبره رهن لمثالها
كم واحدٍ عمره (100) للحين عقله عقل شاب=ولايميز بالمعرفه..دقها وجلالها
ياصاحبي بعد ستلمت العلم..وأوحيت الخطاب=الكلمه اللي قلتها..جاتك بعشر أمثالها
::
حضور اخجله الغياب