منتديات الوئام - عرض مشاركة واحدة

11 / 02 / 2010, 47 : 12 AM

السلام عليكم ورحمة الله وبركاته

موضوعك يا ضمأ يتضمن شقين يرتبطوا ببعض لكن انا عني ما احكم عليهم مع بعض بأحكم على كل واحد لوحده

الشق الأول الي هو الشات والدردشة بصفة عامة
يعني كلنا نعرف انو أغلب ما يتقال في المواقع دي مو كلام حب غالبا مايكون كلام رخيص وكلام ناس فاضية
فالشات أكبر مضيعة للوقت من غير أي فايدة من وراه حتى الي يكون بيدور عن حب أو عن تشبيك حيحس انو قاعد بيضيع وقته وما بيطلع الا بالقليييييييييييل
يعني هو مضيعة وقت للطيب وللبطال وأشوف من الأفضل الابتعاد عنه وتركه وغالبا الواحد حيتعلم في النهاية ويسيبه من نفسه

الشق الثاني وهو العلاقات الي تتكون من الشات
طبعا الي في الشات بيدخل الشات بمبدأ الشك في كل الي حوله لاني ما اعرف عن الي قدامي اي شي
ما اعرف هو بنت والا ولد ما اعرف شكله ولا حتى خياله ولا صوته ولا اسمه ما اعرف الا اسم متنكر فيه
كل الي في الشات لابسين قناع مختفين تحته ودا الي يربي الشك في نفوس الي يدردشوا ودا هو درع الوقاية لهم الي بيحميهم من بعض
شك كل واحد في التاني
طبعا لما ينمو حب بين اتنين من الشات فالحقيقة انو يكون غالبا حب قوي
لانو حب لفكر ولشخصية اعجبت فيها واقنعتني طبعا يا يكبر الحب دا بعد اللقاء اذا اعجبت بهيئة الشخص الي سحرني اسلوبه يا يتحطم ويتكسر اذا صدمت فيه وطلع الشخص غير ما تخيلته

حبايبي كتير مننا متخبي تحت قناع يحس انو يمثله .. يمكن بعضنا عجوز لكن بيتكلم كشاب صغير ومتظاهر بالشي دا لانو دي حقيقته باطنه من جوا شاب لكن هيئته الي هو مو مقتنع فيها ولا متطابقة مع داخله غير
يمكن تقوله انت خدعتني كنت ما افتكرتك كدا ، وهو حيقولك انت الي خدعتني لانك اقنعتني بحبك لشخصي مو لمظهري مظهري ما يمثلني

وزي ما قلت يمكن العكس يكبر الحب بيناتهم وفعلا يكون حب قوي جدا لانو اخد فترة طويلة مرررة فهموا فيها بعض

طبعا مو بس علاقة الحب الي تنتج من الشات لانو دي اقل نسبة من اي شي تاني يمكن تحب عن طريق المعاكسة بالتليفون اكتر من النت

فيه علاقات التعرف والخرجات والجنس ودي حاجة معروفة سواء البنت او الولد يكون حاطط في باله الحاجة دي من البداية ويكون داخل الشات لدا الهدف
ودا خلاص ما حنتناقش فيله لانو هو عارف هدفه واش يبغى يعني ما ينفع تقوله الدردشة مو مفيدة والكلام دا حيقولك طيب اش احسن طريقة اتعرف بيها دلني عليها ايدي على كتفك

فانت تنصحه بانو التعارف اساسا شي غلط مو اسلوب التعارف

وطبعا احنا في زمن النت والانفتاح مافي بنت او ولد بيغرر بيه عن طريق النت والدردشة
كل واحد داخل عارف خطورة المكان وما دخل الا وهو يبغى
يا انو فاهم ويخش من غير ما يدي احد وجه يا انو هو اساسا داخل عشان يتعرف زي الي نازله السوق تقول ابغاكم تعاكسوني

موضوعك كبير يا ضمأ ومجال النقاش فيه كبييييير

اذا كان فيه متسع بعد كدا للاضافة حارجع تاني لكن كفاية علي كدا

ولكم جزيل الشكر

الحجاج