يا الله يا علام كل السريره = يا محصيٍ خلقه كبير وصغيري
يا عالم الأحوال في كل ديره = يا مالك الأكوان وانت الخبيري
يا خالق الانسان نطفه حقيره = من ماء مهين وكل شيء يسيري
تحيي تميت وكل عبد ومصيره = الملك بيدك خاص مالك خشيري
خلقتنا واليوم كلٍ وســــيره = كلٍ على يومه يجيه المصيري
الموت حق وحل فينا نذيره = ولا فيه نفس إلا يجيها النذيري
قالوا كبيره قلت ماهي كبيره = الموت ما يعرف صغير وكبيري
ماتت عسى الجنه لها مستنيره = في جنة الفردوس حظٍ وفيري
ويا الله تنجيها من الزمهريره = وعند السؤال ليا سألها نكيري
يا عين فيضي بالدموع الغزيره = ويا قلب لك مني عزا يالكسيري
القلب يحزن واطلب الله يجيره = جرحه عميق وكن جوفه سعيري
ضاع النفس بين الشهيق وزفيره = ولا عاد اميز شهقتي من زفيري
راضي بحكم الله ونفسي كسيره = مكتوب والمكتوب سيفٍ شطيري
هذا عزاء قلبٍ جروحه مغيره = اطلب له المولى يعين ويجيري
الصبر طب للقلوب السفيره = يا الله تجيب الصبر والأمر خيري
من لا صبر بالكرب يفقد عشيره = ويفقد بعد عقله وحاله خطيري
ذي سيرة الدنيا مشينا المسيره = يا الله بحسن الخاتمه والمصيري