على الصفحات سطرنا وتبدى رحلة المجنون = على جنح الخيال اللي يشيل افكار مجنونه
بدينا يالله الخيره نغني بالقصيد لحون = لجل طرق ٍ يعانقني واجاذب نغمة لحونه
تولم ياقلم واكتب تراني قمت اخيل مزون = اخيل ان الشعر وبل ٍ اشوف بعيني مزونه
ما دام ان الشعر نزف ٍ عسى نزف القلوب يهون = عسى ذاك الجنون اللي سكني زاد بفنونه
نبي ناخذ ونعطي بالشعر معنى على المضمون = ولا به خير في شعر ٍ يعاكس صدق مضمونه
حرام اني لخلي من قرا نزفي يجي مفتون = حرام اني لخلي كل هالعالم يغنونه
سما ياشعر وارقى بالسما حلق / عليك عيون = جناحينك جزالة شاعر ٍ ينظم على هونه
سما فوق السحاب اللي يجي تحتك وهو مغبون = سما حول الثريا والجدي ابغاك من دونه
انا والله لا مني كتبتك يعتريني جنون = نسيت الكل من حولي وعقلي هام بجنونه
ادوّر فكرتي وابحث عن الغالي عن المزيون = ادوّر ما يميزني لجل خفاق مزيونه
لجل اكسب غلاها وامتلكها والبشر يدرون = لجل لا من قرت نزفي تجيني حيل مفتونه
سقى الله قلبها اللي يوم جيته والعرب يحكون = وانا اسمع في سوالفهم عن اللي ساكن ركونه
سكت اسمع سوالفهم ابعرف سرها المكنون = ابعرف من يبادلها الغلا والناس يطرونه
وضاع السمع وسط الهرج ابمسك للهروج غصون = وتاه الهرج من أذني والا يامبعد غصونه
سألت الناس ياعالم ابعرف من هو المضنون؟ = انا مليت من حكي ٍ يغث الروح من لونه
تعبت وتعبت اسماعي ولا ابغى تختلف بي ضنون = ولا ابغى فكرة الشاعر تضيع بزحمة ضنونه
وفجأه كل من حولي لزم صمته وهو مشطون = واحس بصوت من خلفي يحاول يخفي شجونه
واحس بقرب مخلوق ٍ احسه يتقرب بمتون = وضع كفه على المتنين والمتنين بمتونه
اقدم خطوتي بلفه وانا ارقب بالعيون جفون = وطاح الشوف بعيون ٍ هدبها يحمل جفونه
ورمش ٍ لا نزل كله قوي في سطوته ملعون = احاول اقترب لكن اشوف الموت بعيونه
اناظر عينه اليمنى واشوف السيف لي مسنون = واناظر عينه اليسرى واشوف رموش مسنونه
واطالع واثرها بنت ٍ تشيل الزين سحر ولون = ولون السحر يازينه تحتها العرش يبنونه
سقى الله صوتها اللي لا سرى يملا فضا هالكون = سمعته يومها تحكي وضعت شهور في كونه
سمعت حروفها غنت تعزف الضاد ويا النون = سمعت اجنونها نادى : مدد ياضاد يانونه
بدى منها الحكي قالت : هلابه حيل بن خلدون = هلا يالراوي اللي جيت تبغى قلب خلدونه
اذا انك جيت تسألني من اللي ممتلكها ركون = تعال وشوف خفاقي من اللي صار مضنونه
تدلل واخذ خفاق ٍ عشق شعرك عشقه فنون = تولم جيت لك بنت ٍ عليها العلم دندونه
انا لي قلب ينبض لك غلا يوم البشر يبغون = بغوا نبضه لهم يمشي على الهقوه يتمنونه
انا لي عين تنظر لك نظرها يستمد العون = نخى جفني نخى رمشي وقال الدمع ياعونه
ملكت الروح يوم الروح ترخص لك مع المليون = تغلغل حبك بروحي وصارت فيك مشطونه
يعيش الحب لو ان الخلايق كلهم يفنون = ويبقى حبك بقلبي لو ان الخلق ينفونه
هنا وقف حكيها وانتفض لجل الحكي دندون = وبدى نظم القصيد اللي اريد الكل يقرونه
بدى ذاك الجنون اللي بغيته يرسم الميسون = وحيا ذاك الخفوق اللي بغى بالحب ميسونه
انادي بأسمها غاده وانادي والعرب يوحون = واعلي الصوت ياغاده ابي هالناس يوحونه
ياغاده نعنبو جد الغرام اللي يجي بطعون = خذيتي ذنب خفاق ٍ هلك يابنت بطعونه
حسبتك في هوى غيري وغيري معترض لي دون = حسبتك ميته بعشقه وفيه النفس مرهونه
ملكتي كل ما فيني وعقلي فيك هو مرهون = ترا لك وسط خفاقي مشاعر حب مدفونه
عشقتك كثر ما يعشق حروب الدهر نابليون = هويتك كثر ما يهوى صغير السن بالونه
احبك كثر ما نكره يهود الارض مع شارون = كثر ما نبغض امريكا تجي في صف صهيونه
احبك كثر زخات المطر يوم البدو يرجون = سحابة صيف وسميّه اله الكون يرجونه
احبك كثر ما ينبت من التين ومن الزيتون = كثر نبت الخزامى والنفل واللي يحبونه
تعالي واجلسي جنبي بغني بالقصيد لحون = بغني لك سما ياشعر حلق/ وانتي لحونه