قلت : ممكن .. قال : امر .. قلت : تسلم يا الحبيب = قال : وش عندك .. وقلت : بخاطري اسئل سؤال
قال : وش هو .. قلت : ليه انته معي دايم غريب = و انت تدري اني احبك ولا فيها جدال
و كل ما احاول اقرب منك عن عيني تغيب = كني اطرد لي سراب و كني اطرد لي خيال
تكفى لو مره عشاني ودي اشوفك قريب = ليه تقسى يا اناني لا سؤال و لا وصال
يعلم الله حالتي حاله ولاينفع طبيب = كني مثل اللي فقد له عز ٍ و جاه ٍ و مال
بعد ماهو كان يرقا طاح في بطن الشعيب = ارتدت دنياه في وجهه و مال الحظ مال
ما جداه الا يشق الجيب و يجر النحيب = ما بقى له لا عيال و لاعمام و لا خوال
قال : لحظه .. وسع الخاطر و خل صدرك رحيب = والله انك مستحل القلب و العين احتلال
ودي اشوفك ولكن يا فهد وضعي صعيب = لو على كيفي تركت الناس و شديت الرحال
ماني عايش في لهيب ولا تركتك في لهيب = قدر اوضاعي طلبتك يا فهد يا ابن الحلال
قلت : تكفى بس طلبتك تترك الجرح العطيب = لاتزيد الجرح جرح و حالة المجروح حال
قلت : تدري ؟ قال : وش هو ؟ قلت : والله يا الحبيب = استوت في عيني ساعات المفارق و الوصال
فهد الديحاني
.
.