.
.
.
وضح القصايد.! ! لامتى وانتن رقاد؟=شاب السكوت .. وخّوة الصمت صلفه
لعلّ مايقدح على كفّي زناد=لاسقيتكن بعد الضما ذلّ وطفه
لاوالله الا توّ مابانت ( سعاد ) . !!=وتو الهوى ماوّرد (زهير) حتفه
قالت من انت..؟ وقلت يابنت الاجواد=انا القويّ اللي قتل فيك ضعفه
وانا السهير اللي تعداك .. نشّاد=يطرد نهار ويلهث الصبح خلفه
نجمه يغيب وضيعته فيك تزداد=ولااشعل سراجه يصرخ الليل.!! طفّه
سجين هم ولابس.. ثياب جلاد=نصفه ذبيح .. وذابح الموت نصفه
تلميذ مهمل يشرح الدرس لـ استاد=بليد . ! ! واذكى من تلاميذ صفه
وانا الموقع جرحي ادناه .. من غاد=الشاعر اللي طّوع الشعر حرفه
اصعب حروفي لاركب راسه عناد=يلّذ لي لاعسعس الليل عسفه
اعزف لموته اغنية..عيد ميلاد=واسمع صدى صوت النغم قبل عزفه
بالصدر طفل يسحب خطاه بركاد=وبالعجز ريح يرعب الكون عصفه
لي صدفة احلى من الفين ميعاد=ولي موعد احلى من الفين صدفه
وبالناس لي انصاف واقران واضداد=وكل يفسرني على قد عرفه
وبي جرح ماله غير نزفه له ضماد=وشلون اطيب..؟؟ ولابعد كّف نزفه
واللي بعث هود لـ(ارم ذات الاعماد)=انا بزمن يشبه زمن عاد وصفه
أصدق من الدمعه على خّد.. بغداد=واكذب من اللي شافها وغض طرفه
غربه. وهم. حيره. ألم. هم. واجهاد=طالت وضاقت نسأل الله لطفه
ويابنت انا.. طارق مثل طارق زياد=لولا الذي قضبّني الجمر كفّه
والله يالولا. خاطر عيون الاوغاد=لـ اقطف لك اللي ماتمنيت قطفه
.
.
.
خـــــــــــــالـــــــــد الـــردادي