بلغـوا كـل العـذارى لا يسـوّن اعتصـام = وخبروا الاسعاف لظروف الطواري تحتـري
وااستعدوا للشغـب فـي فوضويـة وازدحـام = يمكن اثار الغضب تاصل حدود المشتـري!!
الطواري والمطافي ووالحرس. .واهل النظـام = والحكومـة نبهوهـا . والوجـود العسكـري
واحذروا تخطيطٍ(ن) ارهابـي وتنفيـذ انتقـام = وانا عن نفسـي اباخـذ احتياطـي وحـذري
جاكـم الموجـز ودوكـم التفاصيـل العظـام = ذمتي بريتهـا وصويحبـي ايضـاً(ن) بـري
يوم جاني ناسف الغتـرة وفـي قلبـه كـلام = ابتسم لي ناظره.. ثـم ابتسـم لـه ناظـري
بعدها ثـار الفـؤاد بخفقـةٍ(ن) دون انتظـام = صارت الفرحة في قلبـي تتهـزّع سامـري!
قال لي كلمـة وانـا اوليتهـا كـل اهتمـام = فاتن قلوب الصبايا قال : ((احب البندري!!))
وقتها حسيت نفسـي طايـرة فـوق الغمـام = يوم غيري باعترافه صار وضعـه مـزدري
ايه ياللي تعذلـون القلـب مثلـي مـا يـلام = ايه فرحانـه كثيـر وعلـم اللـي مـادري!
ايه فرحانـه بحـب الاجـودي ابـن الكـرام = حبه اللي في ضلوعي باريٍ(ن) حالي بـري
كلمته حطت بصـدري للفخـر اكبـر وسـام = نلت منهو كان حلمٍ(ن) وسط قلبـي يزهـري
اربع سنينٍ(ن) وخيل الحب ما طـاق اللجـام = اكتم احساس الغلا اللي جايشٍ(ن) به ضامري
لاحكن فيه العـذارى ترتكـز فينـي سهـام = اذكر اني انغبـن.. واعجابهـن زاد قهـري!
كنت احاول اخلق الصدفات مع بـدر التمـام = لاجل افوز بنظرةٍ(ن) منه واسلـي خاطـري
واتجمّـل.. واتزيّـن باللثـام وبالـزمـام ! = واضبط اسلوبي.. بنفس الوقت اضبط مظهري
كم تصنعت المواقف لاجـل اشوفـه والسـلام = كيف اجل ما افرح ليا منه لفانـي مشتـري؟
ياسقا الله يوم جانـي يعتـرف لـي بالغـرام = يوم ذقت الكلمـة اللـي طعمهـا كالسكـري
حبه اللي في خفوقي مثـل مـردوع الوشـام = والله اني غير اصونه.. وافتخر به.. واجهري!
والله انه مـا يشـوف الا الوفـا والاحتـرام = والله ان احساس قلبـي والغـلا لـه ينثـري
المهم .. كـل الصبايـا لا يسـوّن اعتصـام = ذمتـي بريتهـا . وصويحبـي مثلـي بـري