انتهى العمر يالدنيا عليك السلام = وآخر اوراق عمري في يدك والعبي
ماعليها حسافة بعد مالفين عام = عشتها في هوى اللي خيب لمطلبي
نصفها ضاع منا بالعتب والملام = ولانفعني ملام ولانفعه عتبي
ونصفها الآخر الضايع بصمت الكلام = وبالغ الصمت بلغني عن اللي يبي
وراحة القلب من راحة رشيق القوام=وياعسى راحته هي العوض بتعبي
بشروني عسى خلي بلغ للمرام = لاجل اهني قبل شمس العمر تغربي
انتصاره حبيبي فوق صدري وسام=ومنه اعد الهزايم نصري ومكسبي
يازهور الربيع الصيف ماهو دوام = والحذر من سحابه منه لاتشربي
اقبليها وصية مغرم فيك هام = ساكنه في خفوقه وهو طفل يحبي
من عيونك روى نبع الهوى والغرام=ومن دموعك روى التعذيب يامعذبي
منك فكري تشتت بين شرق وشام = لاانته اللي مبعدني ولامقربي
لين نادى المنادي مابقالك مقام = قلت صبرك شويه قال قم ياغبي
قم تولم ولاتسأل وشد الحزام = حكم الاعدام صادر فيك يالمذنبي
ونفذ الحكم بي بفراق بدر التمام = ومقتضى الحكم حطمني ورى مركبي
صرختي بس يكفي منك صدري حطام=دمعتي وان نهرت ارجوك لاتغضبي
طرفي اليا متى وانته حريب المنام = لامتى وانت لنجوم السما تحسبي
لامتى بس ذا التعذيب والله حرام = اشهد انك سبيت لحال وافي سبي
خيم الليل وانهلت دموع الغمام = وسامريات ليل الحزن له تطربي
وجاوبتها القلوب اللي طواها الهيام = بليلةٍ عطرها منه استعاذ النبي
فوق صدري تراقص راعبي الحمام = وفوق قبري زلازل رقصة الراعبي