يالله يامبري الجروح العطيبه=يالواحد اللي تنحني لأجلك (ا)رقاب
يامرضيٍ كل النفوس الغضيبه=يامنهيٍ كل النشايب والأصعاب
تفرج لمن ضاقت عليه الرحيبه=وتقفّلت في ناظره كل الأبواب
ماغيرك أحدٍ لاتعبت ألتجيبه=متوكلٍ بأمرك ومآخذ بالأسباب
نفسي من الدنيا وهمّي كئيبه=ودمعي من أحزاني على الخد صبّاب
طالبك يسّر عسر دنياً صعيبه=تعددت فيها البلاوي والأنشاب
وأرزقني بشخصٍ بعدْك أرتكيبه=يشيل همّي فوق همّه ولايهاب
ديّن وراعي حق .. وافي .. وطيبه=تحكي به الأجناب من قبل الأقراب
عزيز نفس .. ولايشح بنصيبه=أبيض وجه مايهتوي صكة الباب
يحب جاره .. واصلٍ في قريبه=ولاهوب لاحاسد .. ولاهوب كذّاب
ومافيه شيٍ من وصوفه يعيبه=أبداً ولابه شي في خلقه يعاب
ومن روس قومٍ فالملاقا عجيبه=عدوّهم من باسهم ذاق الأتعاب
هذا غرامي .. والردي ويش أبيبه=مادام قربه يشبه لعضة الداب!
والداء مهما كان نلقى طبيبه=إلا الردا .. ماتفيد به كل الأطباب!
واللي يبي إيجاز قولي بأجيبه=بيتٍ يورّخ .. ينوضع لأجله كتاب!!
من لاتخيّر في العوافي صحيبه=وقت الشدايد .. يذهله قل الأصحاب!!!

انا اشهد انك صدقت




ابدعت ثم أبدعت يامحمد ياسبيعي


سلمت يداك



كلك ذوق

...

من لاتخيّر في العوافي صحيبه وقت الشدايد .. يذهله قل الأصحاب!!!

والله حــكــمــــــــــــــــــــــه
صح لســـــــــــانكـ يامخاوي
أبيات رائعة بالفعل كعادتك

أستاذي الغالي
( محمد السبيعي )
صح لسانك وسلم بيانك وبيض الله وجهك
أبدعت فتألقت لتمتعنا بهذه الرااائعه التي يسكن أحرفها وأبياتها لون الجمال وبيت الحكمه وأمنية الحكيم.
هنا يحكي القلم على لسان القلب عن رقي الشاعر ولا أستغراب في ذلك فهو:-
محمد السبيعي الذي عودنا كما عهدناه على أغلى الدرر.
لاهنت يابعدي ولاعدمناك ولاعدمنا تألقك
سجل أأأعجابي
وتقبل بكل الود خالص تقديري

كل داء لازم ينوجد له طبيبه إلا الردا .. ماتفيد به كل الأطباب!

واللي يبي إيجاز قولي بأجيبه بيتٍ يورّخ .. ينوضع لأجله كتاب!! من لاتخيّر في العوافي صحيبه وقت الشدايد .. يذهله قل الأصحاب!!!