|
يوميات....oOoOo ....وئامية
السلام عليكم ورحمة الله وبركاته
كيفكم شو أخباركم طيبين الحمدلله المهم والله اليوم وانا جالس اتصفح الوئام جات فكرة على بالي كيف جات الفكرة اتذكرت لمن انا واخوية ننسدح على السرير وقت النوم وقبل ما ننام كل واح فينا يقول للتاني اش سوا في اليوم دا ويعطي أفكرا لليوم اللي بعدو :( فقلت في نفسي بما أن كل أعضاء الوئام أخوان وأشقاء وحبايب :b ليش ما نسوي يوميات وئامية يعني كل واحد في الليل لمن يخللص كل شي يكتب اش سوا في داك اليوم وفين راح وفين راح واش اتغذى واش اتعشى واش صارلو من مواقف وووو.......الخ... وياليت نكتب التاريخ واليوم وبكدا نتعرف على بعض أكتر وأكتر :rolleyes: نبغى اليوميات تتملا عشان نجي في يوم من الايام نفتح الموضوع ونتذكر سوا الايام ونعيش سوا الحلوة والمرة وتصير ذكريات وئامية :smiley2: ان شاء الله تكون أعجبتكم فكرتي وبانتظاركم يا الغاليين.... محبكم أبو عبدالرحمن (( BLAZE)) |
والله فكرة رائعة ومنها نتبادل الافكار والبرامج اليومية سلمت يداك اخي
ولي عودة ليلا لسرد ما حدث طوال اليوم ههههههههههههه خالص تحياتي لروعة حروفك اسطورة الخريف |
فكـــــــره حلوه ومحتاجه تفاااااااااعل
الله يعطيك العافيه ابو عبدالرحمن واحااااااول ادخل واسرد كل شي هههههههههه . . . |
الاثنين 4 - 2 - 1429 هـ
ابتدا يومي كالعاده من 7 الصبح كان مفترض امر البنك اليومي اخلص شغله بس ماكتبه الله لعل بكره فيه متسع من الوقت بعد الظهر قيلت شوي الى العصر سويت سمبوسه واصابع الجبن للفطور ( صيام يوم الاثنين لا تفوتونه دامكم تقدرون ) بعد المغرب تابعت محاضره قيّمه بنظري للشيخ عبدالله المطرود على قناه المجد العلمية تحدث فيها عن تأثير القران في حياتنا كان في جدولي اروح بعد المغرب لملتقى الاعمار الشتوي السادس بمدارس الرواد بس اخوي سافر <<<< شوفوا كيف الحظ ! بعد العشاء دردشه مع الوالده الله يحفظها واحاول اقنعها تراجع طبيبها بس تقول بكره .. رغم ان علاجها يوم ورى يوم .. الله يهديها بس ويرزقني بِرها الساعه 11 من الليل .. تقريبا فضت بطاريتي قصدي جاني النوم قلت اشيك على المنتدى وكم موقع على الطاير على 12 ان شاء الله سأخلد الى النوم واحلم احلاما سعيده : ) |
فكرة حلوة صراحة
يوم الاثنين ابتدء اليوم عندي الساعة 11 طبعا جلست مع الوالدة ربي يحفظها بعد الظهر طلعنا للبر نتغدى بس ورجعنا >>> م باب تغيير جو المغرب جلسة عائلية بعدها جلست على الكمبيوتر فاتحة الفوتوشوب اسوي اوراق لدفتر التحضير >>> ماهو لي لوحدة من خواتي وتقريبا بأنام على الساعة 2:30 فتكو بعافية ^ _ ^ ( قنوعة والله فاتني صيام اليوم بس ان شاء الله يتعوض ) |
أشكر الجميع على التفاعل
وأتمنى يكون التفاعل أكثر من كذا وبانتظار جميع الاعضاء الاثنين 4 - 2 - 1429هـ طبعا كنت دوبني راجع من المدينة من طيبة الطيبة فنمت تقريبا من التعب الين الساعة 12:15 في الظهر صحيت بعد كده وعلى أتوضيت واستعديت للصلاة أذن ورحت الصلاة وبعد ما رجعت من الصلاة أسأل أمي وش الغذا قالتلي : والله مافيه حيل أسوي شي >>> تدلع :( قلت ياولد خليني أشرب كاسة حليب أحسلي وأشرب كاسة الحليب وأدش النت في نفس الوقت والله وجلست على النت تقريبا من الظهر الى قبل العصر جاتني أختي الصغيرة ربي يحفظها وقالتلي أبغى أروح لأختي (( أختي الكبيرة طبعا)) والله قمت ووصلتها رجعت كان باقي شوي على الأذان أذن ورحت الصلاة وبعد ما رجعت من الصلاة جلست على النت الى المغرب من الاشياء اللي سويتها وانا في النت دخلت موقع الجامعة عشان أشوف معدلي والحمدلله تماااااااااااااام التمااااااااااااااام زاد المعدل :( بعد صلاة المغرب أخوي قالي بيشتري شريط سوني صلينا المغرب وعلى محل السوني أشترى الشريط اللي يبغاه واحنا في المحل جا ولد صغير لراعي المحل وحطلو شريط كورة مرسوم عليه اللاعب دروجبا المهم قال الولد الصغير للرجال : ليش تضحك علي وتقلي في تيلسي في الشريط؟؟ قالو الرجل ما ضحكت عليك في تشيلسي قالو لا مافي قم الرجال أخذ الشريط وشغلو وبالفعل كان في في الشريط تشيلسي قالو شوف في تشيلسي قام الولد الصغير قالو لا مو دا في فريق تاني لدروجبا قالو قصدك المنتخب حقو برضو فيه قالو لا أنا أبغى تشيلسي>>> أنا واقف جنب الولد شوي وأضربو المهم الرجال قال للولد حرام عليك ياخي شوف الفريق اللي تبغاه موجود قم الولد الصغير قالو أقلك لا تحرم شي ربنا ما حرمو >>> اش يبغى ذا والله انا جلس أفطس من الضحك بعدها أخذت الشريط وقلت خليني أمشي أحسن لي و رجعنا على البيت وبعد العشاء جو عندنا ولد عمي وولد عمتي وتكينا سوا الين الساعة 11 ونص تقريبا وجا أبوي وقالي ياواد يالله عشان تروح تجيب أختك والله رحت أنا وأولاد عماني أخذت أختي الصغيرة ورحنا أتعشينا في ماكدونالدز وطبعا ما كنت ماتغدي فطلبت طلب جامد شوي طلبت وجبة كوارتر باوندر سوبر سايز وساندويتش سبايسي ماك تشيكن وكمان تشيز برجر >>> قولو ماشاء الله أتعشينا الحمدلله ورجعنا للبيت وقلبناها بلاي ستيشن بشريط الكورة الجديد اللي أشتراه أخوي الين تقريبا الساعة 2 ونص بعد كده مشيو أولاد عماني ورحت على سريري وهاتك نووووووووووووووووووووووووووووووووووووووم الى الفجر قمت صليت الفجر في المسجد >>> نسأل الله الاخلاص :( ورجعت البت ومو راضي يجني النوم دخلت النت ................ يتبع :( |
الاثنين 4/2/1429 قمت الساعة 7 مع ان سريري قاعد يحلف علي وانا اقوله والله عندي دوام معليش اعذرني.. قال خذيني وياك. قلت وربي ودي بس خلك لايجيك طراق الحين.. وقعدت اتجهز استعداد للدوام.. وقومت اخوي وقعدت سنة وست اشهور وانا اقوم فيه بس لاحياة لمن تنادي لكن قام.. وصلت عملي وفتحت جهازي وعليها لساعة 3 ورجعت للبيت.. ينقال اني باسوي غداء لاخواني وقلت لاخوي قومني الساعة 4.30واسحبها نومة لساعة 6.. قمت وصليت المغرب وررررررررررررر للسوق ارجع لي اغراض شريتها.. ومريت عل محل فطاير تركية واشتري كوكتيل فطاير ومريت اشتري مونة البيت<<<ياشين البيت اذا غاب عنه عمودين البيت(((مامي ودادي:))))الله يردهم سالمين.. وصليت العشاء ونتجهز انا واختي وررررررررررررررر لستار سيتي.. ياجماعة طاق في بالي اتخلص من عقدة الرهبة من الاماكن العالية..لكن طيعوا شوري ولاتسون حالكم فاهمين مثلي..روحوا للطبيب نفساني...يمدحونه.. المهم.. وانا في السيارة وبعد العزم على القرار اني مااخلي لعبة خطيرة الا والعبها.. والله في السيارة احس قلبي ضاع فيني وينه ماادري عنه.. بس جت الصقعة الحقيقية لما دخلت الملاهي واسمع (((وااااااااااااااااااا - وييييييييييييييييييي - وووووووووووووووووو - واااااااايييييييييييييييييييووووووووووووووو))) ضاعت العلوم وصارت الهمة من همة اسدة الى همة فارة بس استجمعت شجاعتي واركب هذه الي يسمونها مقص.. واختي جنبي تهدد فيني..ياويلك اذا غمضتي والعبلكم هذيك اللعبة الي تقلب فيكم تقلب.. المم اذكر لحظتها اني ماخليت نغمة من نغمات الصراخ الاواستخدمتها ولما خلصت ووقفت...واستوعبت اني في الارض واطالع يمنة ويسرة الا واحس بنشوة الانتصار...هي تخوف في لابداية وبعدين عدت اللعبة 3مرات من الفرحة اني صرت مااخاف...تدرون ليش؟؟؟ لاني اصلاً مغمضة ومااشوف شئ<<<وش الفايدة؟؟:dizzy2: والمهم وانط على قطار الموت..وبعدها الكوبرا وبعدها سيارات وشفت اشكال بناتنا اذا بيسقون في المستقبل الي ياجعله مستقبل بعييييييييييييييد.. واستانسنا يالله لك الحمد..اشوي ونسمع هالطق...:drummer: وندخل لموقع الحدث.. واكتفي بقول (((دخلنا موقع الحدث))) المهم جاع بعضنا بعد الخروج من موقع الحدث..وطلبنا الي انطلب..واحنا نطلب في ولد في ثاني ابتدائي جا سال اختي.. لو سمحتي ماشفتي اخوي الي لابس مثلي... وااه ياجماعة لو تشوفونه..اولاً دبدوب وماسك يدينه مسكة القلقان ويعضعض في براطمه وحالته صعبة بس ودي اني بلعته من طعامته وامسكه وابي أهدي فيه.. اقوله: حبيبي لاتخاف الحين ندورلك على اخوك .. قال: انا موخايف بس هو اخذ ايسكريمي.. والله ياطحنا ضحك عليه بس ربي يسعده ويجعله من الصالحين يطالع فينا ومبسوط بنفسه لانه ضحكنا..المهم اشوي وينقز مثل الخبل لانه شاف اخوه الي ساحب عليه وفعلاً يشبهله بالضبط اللهم انه اطول منه.. تعشينا وقعدنا نسولف حتى طردونا من الملاهي... ورجعنا الى قواعدنا سالمين ومنتصرين واحط راسي نظراً لانتهاء الشحن ونمت...والله العظيم اني نمت ونمت من قلب.. وهاأنا قمت:grin: |
يوم الاثنين 12/2/2008
صحيت 5 ونص صليت قرات بعض الادعية رجعت ونمت لين الساعة 11 قمت شربت القهوة وجلست وحدي كالعادة صليت الظهر جلست على النت لين الساعة 3 قمت شفت تمثيلة الامبراطورة صليت العصر جلست وحدي برضو لين صلاة المغرب رحت عند صديقتي من الساعة 6 لين 9 ونص رجعت للبيت وصليت العشاء شفت مدي الحياة دخلت غرفتي الساعة 12 نمت الساعة 1 وهذا كل يومي وكل يوم نفس الشئ |
بلازي
نسيت أشكرك الله يعطيك العافية وشكرا لك |
فكرة رهيبة بلازي
يوم الاثنين : قمت من النوم الساعة 04:30 صليت الفجر وشغلت سيارتي وقشيت اهلي كلهم ورحنا على رماح العائلة الكريمة كلها مخيمة هناك يعني يومي راح بين ركوب الدباب ولعب كرة القدم وكرة طائرة وجلسة طويلة مع كبار العائلة وجت الساعة 11 وانا ما اشوف الطريق نمت عاد وقمت اليوم الفجر وجلست هناك الى 11 ورجعت انا الرياض لحالي واليوم بالليل بارجع لهم اختصرت لك يومين ورا بعض بلازي الف شكر |
| الساعة الآن 14 : 08 AM بتوقيت السعودية |
Powered by vBulletin® Copyright ©2000 - 2024, Jelsoft Enterprises Ltd.
new notificatio by 9adq_ala7sas
[ Crystal ® MmS & SmS - 3.7 By L I V R Z ]