ابدا بذكر اللي له الجنه والنار=الواحد المعبود رب البريه
ويالله ياكاشف خفيات الاسرار=وياعالم ٍ مافالقلوب الخفيه
ويارافع ٍ سبع السماوات جبار=ومخلي عيد المسلمين الضحيه
تفرج لقلب ٍ من صواديف الاقدار=بين الضلوع العوج ميتين كيه
يا ما صبرت وراعي الحب صبار=يخفي عذابه كان عنده حميه
ساعة زواجي ياعرب فكري أحتار=الموقف اللي أهتز منها طميه
جلست افكر مدري ويش الذي صار=قدام عيني طاح و أغشي عليه
من بكره العالم يعزوني بـ( أسرار )=بنت الحلال وموتها أكبر بليه
جوني اهلها وقالوا هذا الذي دار=مرتك ماتت وانت عزومك قويه
وهذا قضى المعبود .. بيديه الاعمار=والموت حق وكل نفس ٍ رضيه
يالله ماني معارض ٍ فيك الاقدار=يالواحد القهار .. مرسل نبيه
مير البلاء شي ٍ بقلبي كما النار=وتكثر لهايب كل ماشفت زيه
والموت عين الموت لاجوني زوار=ابو سعد واخوانه أهل البنيه
يا عنك في قلبي ثلاثين منشار=وامسح دموعي ثم يارب حيه
يامرحبا واهلين ياخير من زار=ساس الشجاعه والكرم والحميه
اشوف وجهه ثم الاعصاب تنهار=نفس الملامح .. نفس ذيك الشفيه
قبل الوفاه باسبوع مهدي له تذكار=وكاتب على العلبه هديه .. هديه
ثم جاتني (العمه) تبي تشوف الاخبار=اشم ريحتها ,, هي نفس الهديه
ياويل قلبي من صواديف الاقدار=ويكفي قليبي فيه ميتين كيه
من بعد ذاك اليوم والفكر محتار=مدري اصدق ولا تكذب عليه
هذي نهايه فكرة بين الافكار=حطيت نفسي بين روحه وجيه
يارب جنبني صواديف الاخطار=انا دخيلك ياجزيل العطيه
كتبت ابياتي وقلبي على نار=من حر مونس قلت هذي وذيه
هذي هي الايام والوقت لو جار=ما سامحك يامعذرب ٍ في خويه
وقت الرخا كل ٍ لك حجاب وستار=ووقت الشدايد مانعين شويه
واسلم وسلم ياطويلين الاشبار=والعذر منكم كان مني خطيه

الجرح الكبير